日月星快餐 (窮人雞脾)

人均消費：HKD$23

之前同朋友去到九龍灣，食黎食去都係360, McDonald's, 吉野家，韓食家。食到好悶，即時諗起就撥個輪俾朋友，朋友推介我食呢間，俾佢左呢間野個地址我，我開埋google map ，佢都搵唔到係邊。唯有問路人，原來係橫街入面，心諗個friend 會唔會老點我，點我入後巷。但一入到去就知係好野，條人龍長到呢，仲以為唔洗錢派。

再望左兩眼個餐牌，有90%野食係$35有找。真係真係好q平，就連IKEA 食個肉丸差不多既價錢可以食到個飯。

咁終於明白點解咁多人，仲要好大部份人係叫外賣，好少人堂食(堂食好少位)

今次推介 ─ 脆皮雞脾飯 ($23)

第一腸粉 (腸粉米芝蓮)

人均消費：HKD$19

睇米芝蓮搵野食，都有少少保障，我自己本身都幾鐘意食腸粉。香港既腸粉有兩款，一款係即包，一款係來貨。即包其實同佐敦堂記差不多，都係獨sell腸粉。第一腸粉都仲有其他野賣，好似粥，蒸飯和小食等。但你都知，佢出名既係腸粉，所以其他野就可免則免。宜家都過左米芝蓮公布期一排，所以唔洗好似添X運咁等位。

蜜汁叉燒拉腸 ($19)

小白鷺餐廳 (小鳥與風)

人均消費：HKD$118

有次個朋友無啦啦問起入唔入大埔食扒，我一口就應承左，個朋友今次仲開埋車黎接我，我心諗，洗唔洗。跟手直入大埔。我眼見佢架車係大埔道行左好耐都仲未到，係某個彎位轉入，再行。我終於明白點解唔係好多人入黎，因為無巴士直到門口。我個Friend 仲話佢Book 左In door。話晒呢期都凍凍地。

呢間野就真係要Book，事關場地雖大，如果touch wood 有好多人都book 左in door，咁就大鑊。我首先要承認今次絕對係食環境多過食野。你睇下個View 先講，因為真係好relax。

Indoor

吉豚屋 (新一代吉列豬扒專門店)

人均消費：HKD$52

2013年第一餐，點都要食d特別野先至令到自己無咁悶，今次我就去左淘大商場既吉豚屋，佢係香港第一間分店，之前開張時都有好多人排隊，臾今次就去食左兩個Set，一個係野菜豚肉定食 and 滑蛋吉列豬扒飯你可以揀大中細個價錢又唔同。其實正常人食個中既已經好夠。

今次推介 ─  野菜豚肉湯定食

個炸豚肉先係正野所在，事關出面餐廳食野炸豬都用上各式既炸粉，有時都幾厚身，分分鐘厚過豬扒肉身。但呢間野既好在於佢既炸粉好鬆化，又唔太厚，再者唔多油。佢既炸法都幾新穎，食炸豬扒有時真係要搵專門店。有錢就當然食丼吉，唔多錢就可以食呢間。想有咁多野加埋一齊既炸豬扒，只係$59，一d都唔貴。

野菜豚肉湯定食 ($59)