海傍陳記 (仿古店一般都係得個古字)

人均消費：HKD$34

手撕雞飯 ($34)

自地鐵去到西環後，一個舊區既舊式小店都消失左唔少，貴租已經成為左主因，仿舊店見生意好開下一間開下天一間，佢地用既地磚或牆紙都係舊式少少為主，連鎖就有間瑞士xx，羅X記，佢地都係Sell 懷舊，不過野食就一般都係麻麻地。

呢間海傍野就都係同D sell 懷舊野差不多，佢個飯都唔係一D咩咁特別野，不過佢勝在夠平，一個手撕雞飯都係講緊$34，都叫做抵食。

中國冰室 (電影拍攝場地)

人均消費：HKD$38

呢間冰室係香港其實都係一個比較舊式既冰室，香港已經買少見少呢D地方，電影拍攝到一D舊既地方，少不色去呢D冰室，如果你抱住個心態係慢活又或者係想去懷勉過去，呢間佢絕對係好好既餐廳。佢有舊式吊扇，舊式樓梯，舊式傢俱，舊式牆磚同地磚。

一入餐廳，你會有個好唔同既感覺，出面係繁榮既旺角，轉入一條小巷就已經係舊式餐廳，對比相當大。亦都係呢間餐廳既特色。我今日都係餐廳入面坐左成兩個鐘，佢又唔會嘈你，望住吊扇慢慢食。正。比起一般Cafe，我自己就prefer呢D餐廳。

牛肉炒麵 $38

南龍冰室 (金磚麵包茄汁焗豬扒飯)

人均消費：HKD$41

南龍冰室呢間餐廳其實已經係筲箕灣開左好耐，但因為創辦人係幾年前唔再經營，所以執左，但有個有心人，重開番南龍冰室，仲要沿用當年食譜。今時今日既南龍已經俾佢改革得好勁，好似有本好靚既Menu，加上左好多新派美食，就好似金磚麵包茄汁焗豬扒，呢D都係舊冰室無既野。宜家新既南龍，佢係銅鑼灣via tokyo，咖啡弄富山拉麵，老虎咖喱附近，勁多好野食係附近，所以南龍無番咁上下，都唔易立足。

今次推介 ─ 金磚茄汁焗豬扒飯 ($82)

海安咖啡室 (外表幾十年不變)

人均消費：HKD$12

今日去呢間海安咖啡室都係因為連我老豆都知佢幾十年不變，所以我會一會佢，佢呢間野叫海安咖啡室，出名既野都係咖啡，但我個人唔係好飲咖啡，只好食其他野，佢出名既野原來係叉燒公仔麵，但sorry，佢又唔係成日有，佢可以好寸咁同你講，無wor。明天請早。呢D咪係霸氣。但你可以坐成個朝早，佢都唔會嘈你，唔係間間ok。

我今日去，某程度上係因為佢夠舊，呢間野位處信德碼頭對面，一間超大間咖啡室，佢大可以放租，又或者賣左佢，老闆佢食埋下半世都無問題。但佢繼續用番幾十年前既裝修，咁既堅持，抵幫襯。

榮華冰室 (隱世冰室)

人均消費：HKD$15

上網成日打咩隱世餐廳，咩隱世，但事實上要搵隱世真係唔多，又要遠離市區，又要有少少舊，咁先可以叫隱世。今日去左茶果嶺搵食，搵食之前我都做左好多research ，咁先去，事關個地方都偏僻，唔係咁易去到。

茶果嶺呢個區，自地鐵將軍澳線起左之後，呢個區多數都只係村民先會經過。再加上入堆填區係將軍澳，經過茶果嶺既車多數都入將軍澳堆填區，呢個社區仲可以保留純樸既一面。

瑞士咖啡室 (仿懷舊冰室)

人均消費：HKD$32

宜家呢期好多特式野都係港島區係中環想食平野，其實選擇唔多，加上又要搵D有特式既餐廳少之又少。瑞士咖啡室都算係連鎖式既仿懷舊冰室，佢既地板間間分店都係綠色格仔，清一式都係咁。佢既裝潢都仿懷舊，大家想去下就無妨。

食野就一般啦，但個價錢就唔係好一般。

泗益 (赤柱平民餐)

人均消費：HKD$33

講起赤柱，大家都會不期然諗到貴既西餐，但作為香港人，又唔一定去到赤柱就一定食西餐或者貴野，我呢D窮人成日都食平民餐，入到赤柱都會搵D平野食。唔好以為我為左食平野而食平野，你大可以上Openrice搵下赤柱有乜食，泗益就係赤柱既首位。

講下佢有幾吸引先，佢既野食係即叫即制，所以你要預留DD時間去等食，唔好等到最後一分鐘先入去。因為有可能要排隊，係食Lunch 既時間去幫襯的話就多數要排隊，仲要排左隊都唔一定有野食，佢D野食好快就賣晒，所以睇下你既彩數。係大時大節入赤柱既話，多數都食唔到，平日去食會好D。

今次推介 ─ 魚柳包 ($13)

嘉樂冰廳 (街市大大奄列)

人均消費：HKD$30

我上星期都係荃灣，食左蘭香，食唔到嘉樂，所以今日就再黎荃灣，食番以蛋出名既嘉樂。佢出名既係火腿奄列，所以本住肥死就算既心態去幫襯。呢間野出名既奄列係用7隻雞蛋黎整，齋計7隻蛋既卡路里已經有644卡路里，一個常人，每日都係攝取1,800~2,000卡路里。如果齋食晒d蛋未計火腿同汁&飲品，已經係一日既35%。所以係本肥黎食。佢另外出名既有奶昔，我都試埋。

奶昔去老麥都成日飲，黎黎去去都係三隻味，呢間奶昔仲有其他幾隻味好似鮮蛋奶昔、阿華田奶昔、好立克奶昔、雪糕奶昔，不過都係同老麥差唔多。叫就叫多幾款你揀，不過收到成$25一杯就真係貴左少少。不過佢都係即叫即整，因為上檯時個杯入面都有冰碎，可想而知佢個奶昔真係fresh。

阿華田奶昔 ($25)

炊豕店 (懷舊豬飯小店)

人均消費：HKD$43

懷舊小店都幾值得人回味，但宜家香港既租金真係好貴，好多老店都做唔住，佢D野食加到太貴，去都唔係咁想。新開既食肆有D會以復古為前提。禮頓道聖保祿學校隔離開左間叫「炊豕店」既餐廳。睇中文字，我都唔識讀呢間野既名。「炊」讀音「吹」解作燒飯；「豕」讀音「始」解作家豬。真係自中七中國語文及文化科後都無再讀過，今日食餐飯，反而上左一堂。

呢間野沿用公雞碗上佢既秘製豬扒飯，宜家用公雞碗既食肆真係唔多，話雖而家都有商家重出公雞碗，但都叫做有Heart。

澳洲牛奶公司 (浪費美食餐廳)

人均消費：HKD$33

之前睇報紙先知台灣人黎到香港好鐘意去澳洲牛奶公司(下稱澳牛)，我都發覺自己已經好一排無去過澳牛，以我記憶，上次去食由坐低到走人都係15分鐘內既事，今次吸取左上次既教訓，識得點樣慢D食。(但伙計既上菜及落單既速度不變，都係咁快)

去親都係食常餐，佢常餐都係包+蛋+火腿+麵+熱飲。佢既好食既都係個蛋同麵。

澳牛，個餐廳名都話左你聽，佢地係用牛奶黎整野。佢既炒蛋方面，就係加左牛奶去炒。而其他出名野好似燉奶，我就今次就無食到。

華星冰室 (名人冰室)

人均消費：HKD$34

華星冰室可能你聽左好耐，分店都有三間，仲要係明星開既。講到咁我都仲要推介，好明顯真係好食。其實呢間野我都唔係第一次去，今次食佢既蛋，真都仲係好滑如果你係鐘意食茶記既炒蛋，呢間都係一個幾唔錯既地方。呢間野好在一早講左佢既蛋係用日本北海道3.6牛乳整，3.6牛乳飲既時候你都覺得好滑，佢用係炒蛋方面簡直係靈丹。

再講下佢既牛肉，佢既牛肉真係好腍，但就係唔係好香牛肉味，可能落左d唔知乜野「拿」一「拿」佢，咁我都有少少失望。定係我少食清真牛肉呢，咁就唔知喇。

今次推介 ─  常餐

常餐 - 牛肉通 + 火腿炒蛋 ($34)

其記 (大澳凍檸茶)

人均消費：HKD$21

呢間其記並唔係我求其衝入去，我係一早入去大澳時，已經plan 左要入去會一會佢。一日行山，入到大澳，個人已經好熱，仲要食埋乜炭爐雞蛋仔，個人已經好熱，想飲番杯凍飲。但你都應該知道大澳有好多野食，你都想留肚食其他，我都不妨講你知。飲一杯凍飲再去搏殺都未遲。

香港人奶茶同檸檬茶都成日飲。尢其係凍飲。太興或金鳳茶餐廳出名就係無冰既凍奶茶，其記就出名無冰凍檸檬茶。免篤檸茶，啱晒我呢D懶人。但一杯好既檸檬茶，要有紅茶香及少少澀。

必飲推介 ─ 無冰凍檸檬茶 (唔好飲你可以直接同老闆講)

紅茶：70%
澀：20%
甜度：50%
冰凍度：60%

無冰凍檸檬茶 ($14)

民聲冰室 (鹹蛋肉餅專門店)

人均消費：HKD$38

今次講既係大坑既民聲冰室，大家不妨一上openrice，睇下民聲有乜食。我可以答你係鹹蛋蒸肉餅。仲有無其他呢？答案係接近無咁囉。但我點解都講，就係人講我又講。不過我係以平方面講。

鹹蛋蒸肉餅又叫做火山肉蛋，lunch 食就$38，份量係細DD。晚餐就係大d，座山高D，影相誇D，同貴D。講左咁多D，就係話你聽分別不太大。如果lunch 入到去就可以食少D，同平D。

鹹蛋蒸肉餅 $38

祺森冰室 (坪洲美食)

人均消費：HKD$30

坪洲暫時仲未好似長洲咁多人去，有時去坪洲都係去行下手1指山，兜個圈就算啦。但有時去食一個地方，唔多唔少都會幫襯一D地道野。問左D朋友，去坪洲有乜好食，佢就話蝦多士。聽佢咁講，我自己都上網search 過坪洲蝦多士，發覺好評同負評都有，咁應該鴿睇下老闆心情同埋D油炸得好唔好有關。但去到，見到門口個餐牌，寫住$30。一個Tea 做$30，仲要係坪洲。洗唔洗咁貴呀。

講下個蝦多士既用料包括：蝦肉、豬肉、多士及沙津醬，用料相當十足

先講蝦肉，佢用既都係D細蝦肉，即細細蝦仁，蝦味自自然然唔會太重，又唔係十分鮮啦

豬肉，既用途都休想整到件多士肥D。同足料D，令到更軟滑，其他作用唔大

多士：因為新鮮炸起，卜卜脆，熱兼燙口，油份仲未迫番出黎就上碟，所以頗熱氣。

綜合番以上既野，蝦肉細隻唔鮮；多士卜卜脆。一般啦。唔太差，不過收我$30又係貴左少少。

所以都係一句。咁應該鴿睇下老闆心情同埋D油炸得好唔好有關。所以睇你好唔好彩(laughing)

蝦多士 ($30)