津津食店 (西環無乜野好食)

人均消費：HKD$42

當一個區無野食，只要你有食店，佢就已經可以係當區既美食，呢個可以用地利解釋。就好似今日，我夜晚去到西環，就openrice 下有乜好食，見呢間有唔少好評，就入左去，心諗$40幾蚊就有好野食，我好有期望咁等食。雖然都只不過係食個豬扒雞翼飯，不過最終都係失望收場。

皇牌飯 ($42)

海傍陳記 (仿古店一般都係得個古字)

人均消費：HKD$34

手撕雞飯 ($34)

自地鐵去到西環後，一個舊區既舊式小店都消失左唔少，貴租已經成為左主因，仿舊店見生意好開下一間開下天一間，佢地用既地磚或牆紙都係舊式少少為主，連鎖就有間瑞士xx，羅X記，佢地都係Sell 懷舊，不過野食就一般都係麻麻地。

呢間海傍野就都係同D sell 懷舊野差不多，佢個飯都唔係一D咩咁特別野，不過佢勝在夠平，一個手撕雞飯都係講緊$34，都叫做抵食。

尼斯餐廳 (老店西餐)

人均消費：HKD$65

尼斯餐廳其實就好多讀HKU既朋友都應該食過，佢同沙X娜一樣出名，就係正正佢地兩間都係食扒既，不過沙X娜就近學校多D，尼斯就係平少少咁，各有各好。我自己就當然覺得平既就食學校Canteen，有時Quality 都唔會太差，只係無乜味咁，又唔係個個都受到，所以尼斯又可以提供到唔太貴但又好少少既餐廳，所以都會去下架。

發育期一般學生都係大食，做得學生生意既，呢間餐廳既份量都係大份DD，如果唔係D學生都係唔夠食。尼斯都係比較Size 大，一個Set，有蒜蓉包+飯+甜品同餐飲都係$65，佢都算係幾有良心，俾足料。

白汁牛利飯 ($65)

可可店 (平民價煎腸粉)

人均消費：HKD$30

煎腸粉或炒腸粉(下稱煎腸粉)係香港其實已經唔係咁容易搵到，事關工序多過一般腸粉，仲要存放期短，所以唔多地方有得食。煎腸粉之所以好食在於燒蕉部份腸粉，令到更加香口，手勢好既師傅當然係唔會炒燶，種種原因下，真係唔多地方有，有D茶樓都會做煎腸粉。

近年酒樓已經興起用點心紙，少左推車仔，煎腸粉呢樣野已經愈來愈少有，取而代之既係玻璃腸粉，來貨既腸粉都已經少左好多，不過都無計。但始終食法唔同，兩者無得直接比較，所以仲可以生存。

可可店最出名既就係煎腸粉加蛋，同埋佢既糖水，尢其夜晚，佢真係堅多客。仲有佢又平，一個飯款都係$30幾蚊，仲可以加$2有支裝可樂，下圖仲有Menu。

今次推介 ─ 煎腸粉 ($14)

周記點心 (流沙點心)

人均消費：HKD$26

近日一間寂寂無名記茶餐廳，多得好多網上既報道，星期六日都搞到好多人去幫襯，原本營業時間至晚上九點，就係因為好多人去所以佢既營業時間亦都提前左係五點左右閂門。如果想去食既就唔好太晏去，因為好多野食都賣光。

佢出名既係巧手點心，每一期都會推出一點嘅新口味點心，但如果你都係想食到的話就一定要趁早去，因為近日都好多人去左，所以去好早就賣晒曬。最出名係流沙多士同燒賣。

今次推介 ─  各類多士

香芋多士 ($30)

金祥排骨麵 (薄炸腐皮)

人均消費：HKD$30

西營盤周圍食，一條水街就已經好多野食，佢既食客之前都係以HKU學生同該區居民為主，但宜家真係百花爭艷，好多食店都開左，為既都係賺埋地鐵條水，話晒宜家入西環方便左好多，好多人都會入去食野，一間間老店亦都要面對挑戰，好多新店開張，留得住既老店都唔係太差，呢間出名炸豬扒，不過其實既炸腐皮都唔差。

今次推介 ─ 炸腐皮

阿元來了 (超有去左台灣Feel)

人均消費：HKD$26

呢期好多人都話西營盤開左間台灣野，一心地鐵仲未開通，好快D去試下，因為西營盤站一通車就大把人去，加上好多網上既人都討論緊，所以我會加埋今次既搵食心得。阿元來了最好幫襯時間係下晝兩點半至五點半，因為蚵仔煎既供應時間係下晝兩點半至五點半。 其他野食就係全日供應， 所以如果你想食埋蚵仔煎，最好睇清楚時間， 加上佢既野食好快就賣晒，下晝六點就可以收工，簡單d講，下晝去啦，講完。

呢間都算得上係台灣野既食，佢既整法都係比較台式，

今次推介 ─ 魯肉飯 ($27)

叁去壹點心粉麵飯 (飲茶唔洗吸點心卡既舊式小店)

人均消費：HKD$40

近期熱話都係好多舊式小店都敵唔過貴租而執笠，呢個時代巨輪太恐怖。舊式食店可以做到今時今日，過得到沙士，D野食差極有個普。叁去壹係一間茶樓仔，但佢Sell 既野，可以媲美大酒樓，不過地方就預左唔可以同酒樓比。

薄扶林道，就好似彌敦道咁長，住係港島西區或南區就一定聽過經過同去過。附近仲有間大學，係邊間就係香港人都識既香港大學。但超好彩既係呢間野同好多舊式酒樓一樣，以裝修吸引，佢用食物吸引你。

佢既點心唔係分左好多個價錢，食野又唔洗吸點心卡，好多特色都唔係宜家D酒樓有。

真滋味美食 (烤雞脾店)

人均消費：HKD$23

今次推介 ─ 烤雞脾

平時食雞脾就食既炸雞脾，佢係同KF字頭既無得比，好食好多。呢間位於西環既烤雞脾，都係一間小食店，但區內朋友就話好出名，話晒呢區既小食店唔多，而且呢間野雞脾整得好好食。佢既雞脾有烤有炸同有醬汁，雞脾就係呢間野既出名野，其他野可以唔食，(利申：我叫左其他野食)，都係雞脾最得。

小食店既唔好處就係無得俾你坐係度食，我都係買完拎過對面公園食。呢個公園都幾好，有埋Toilet ，食完仲可以洗埋手。

新興食家 (堅正流沙奶皇包)

人均消費：HKD$24

今日黎到西環，呢個地區比較上係香港既舊區，好多年前已經好多人集結，但直至今日都仲未有地鐵，就係咁，勝在夠遠，都唔係好多人去，咁野食質素仲未俾大量強國人攻佔而變差。今日為左食流沙奶皇包先黎呢間，朋友口中既明星奶皇包就係呢間，呢間野其實都開左好多年，好耐之前已經好多明星黎，事關營業時間就晒佢地，晨早開門，下晝三四點就閂門。如果想去的話，就要睇時間。

佢有多年整點心經驗，所以經過多番改良，D野食都有番咁上下，唔好食既佢都唔賣啦

今次推介 ─ 流沙奶皇包

源記甜品專家 (失色老糖水舖)

人均消費：HKD$26

同西環人講起正街糖水，3歲到80歲都會同你講源記啦。事關呢間野開左50年，好多名人都係坐上客，我回憶自己細個時都有去過呢間，我之前都覺得好食，唔知係唔係當年窮，無乜好野食，時至今時今日，我先有少少錢去周圍食。

如果齋睇個價$26蚊，我應該一早ban 左佢，但我以前都食過，仲要好好食，點都會想再食過。加上佢個碗上有個托，個托都係一個經典，因為佢有個銀器既托。所以我先會再去幫襯。

佢出名既係合桃露，想當年我食既時候，佢既合桃係有一粒粒，仲要唔烯。加上D老人家講話源記用石磨去磨D合桃，所以食出黎時仲會有一粒粒但已經好溶。

合桃露 ($26)

一休料理 (香滑熟三文魚)

人均消費：HKD$45

西環水街係一條超老既食街，事關附近有學校 ─ 香港大學，HKU 學生落水街食野已經唔係一朝一夕，又係一個學生Canteen。見今日行開西環，咁就聽佢地講去左呢間食Dinner，跟手就落正街食糖水。

呢間一休料理，個Waiter 就同我地講佢個香滑芝士三文魚飯都幾好，仲有汽水。呢期Special，咁就聽下佢講。叫左呢個佢口中既推介，食落又覺得ok。

今次推介 ─ 香滑芝士三文魚飯 ($45)

詩餅坊 (西環綠茶甜品)

人均消費：HKD$32

西環係港島上比較西既地方，睇日落係個好地方，星期六日夜假時先坐車入去High 個tea，食件cake，再行出海邊睇日落咁就一日。幾perfect。

詩餅坊我都係上網search 過，近期都有好多人講，我又點會咁執輸，一於會一會佢。

間Shop 有兩張檯同幾張椅。我就坐在其中，我仲諗緊食乜之際，短短三分鐘，有三個客人入黎拎餅。三個都係order左綠茶紅豆蛋糕，兩個仲係原個買。見咁多人買，我即時叫件裝綠茶紅豆蛋糕。

講番件Cake先，圍邊既係綠茶馬卡隆，內層有忌廉、綠茶蛋糕、紅豆。

我鐘意Crossover咁試食
1) 綠茶馬卡隆 vs 綠茶蛋糕 ，甜同綠茶味濃 - 正。(tongue)
2) 綠茶蛋糕     vs 紅豆         ，綠茶同紅豆都係唔夠味
3) 綠茶馬卡隆 vs 紅豆         ，紅豆好淡，馬卡隆好甜 - 正。(tongue)

綠茶馬卡隆先係呢件Cake 既靈魂，但似乎多左d(hypnotized)。佢d紅豆就真係敗北之處。整體上係好食。但應該原個上，佢既綠茶馬卡隆少d會更好。如果你問我，我下次會原個叫，都好似係$250左右。

綠茶紅豆蛋糕 ($32)