丼家 (小店刺身丼)

人均消費：HKD$86

我好少入去元朗，今日入到去元朗，當然係要搵餐好食，小店係首選。我去呢間前都睇過openrice，睇過下佢既圖片，見佢又近元朗西鐵站，行過去都係五分鐘嘅事，加上openrice上面嘅comment都唔係好多，都仲未俾人煲，D comment 都係可信。

今次推介 ─ 蝦皇丼 ($86)

東京食堂 (野食多用微波爐番熱)

人均消費：HKD$92

早排，呢間野畀幾個Blogger 打佢有幾好食，仲要甘埋雜誌，好似好正咁。我之前都去過，都見到好多人排隊，可能間舖好細，所以容納唔到咁多客，今日我俾時間佢等。好，我一入餐廳，見佢個價錢Compare with 尖沙咀又唔太貴，以佢既格調，其實都係一般。我自己一個人食，都要$92埋單，我自己都覺得有少少貴。

講真佢個煮法我唔係好Buy，佢用微波爐叮叮黎煮既比重都好高，我睇佢煮幾檯野都係叮，唔係煮，咁佢即係一早整好左，然後番叮，聽阿媽講微波爐食得多都唔健康啦，咁我做乜俾成$100食叮叮野，不如食波仔啦。我仲要坐Bar 檯，睇住佢係咁叮叮好方便咁。

蟹肉忌廉薯餅 ($24)

哥登堡餐廳 (港式扒房)

人均消費：HKD$90

近日聽見一D舊式既港式扒房都相繼執笠，呢D舊式扒房已經買少見少，所以唯有快D去幫襯下。其實我自己都幫襯過其他舊式既港式扒房，好似飛鷹、美而廉、金鳳、波士頓同金雀。呢間哥登堡我就未食過，食完之後我都發覺D舊式既港式扒房係有一個共通點，就係大件夾抵食。

今次呢間就麵包+湯+一個頭盤再+一個主菜。

湯都係紅白湯；
頭盤裡可以揀田螺或串燒；
主菜扒方面你可以揀兩款扒類。
淨係個湯，麵包同頭盤都已經好飽，所以如果你係一個細食既人，個麵包真係可以拎走做第二日既早餐。

牛魚扒 ($90)

Haru Haru (Happy Hour 食炸雞)

人均消費：HKD$81

食炸雞真係易左好多，韓國炸雞拼啤酒簡直係美事，呢間係一間超平民化既炸雞啤酒舖。我都係睇完個Menu 先諗到可以一個Happy Hour 食炸雞飲啤酒吹水，又唔貴既一件事。一個半份既炸雞加四支啤酒，埋單$139，如果兩個人吹水計，一人都係$70，佢話雖有限坐2小時，但絕對夠你Happy Hour。絕無吹水，我仲列埋條數出黎，頁尾仲有張單。同埋下次去Happy Hour 我都會推介俾朋友。

	數量	單價	價錢(HK$)
炸雞半隻	1	79	$79.00
韓國啤酒Lite	4	15	$60.00
埋單合共			$139.00
人數	2
人均消費			$69.50

今次推介 ─ 無骨香辣炸雞半隻 ($79)

黑鉄屋 (伏之拉麵)

人均消費：HKD$97

夜行灣仔，諗住呢個高消費既地方，附近都有幾間拉麵，見呢間個Comment 都唔係太差，就去試，一試就虐待自己個肚，仲要俾成$97，未入餐廳時，見到餐廳都唔係好多客，都已經聞到伏味，心諗唔通貴野唔多人黎，一試就知道自己太樂觀。俾我下次都係去番神虎，at least 個湯正D。

赤兵衛 $97

中村藤吉 (不值得排隊既抹茶)

人均消費：HKD$97

開左一排既中村，話晒佢既茶葉係日本都幾出名，今次佢黎香港開分店，仲要食正抹茶條水，好多人都話點都要排一次。個個都話想去食，加上佢又收得早，一眾打工仔想食都唔係咁易。一係有朋友番Shift，可以排定，一係就3~4點去排下。

事實係我食完呢餐完全覺得排隊時間係浪費，因為佢既質素又唔值得你排咁耐，加上佢又唔係好平，一個Set，唔太有特色既，但要你成三個鐘既時間，呢個先唔抵。

腐皮抹茶蕎麥麵餐 ($78)

武士拉麵 (水質要求高拉麵)

人均消費：HKD$97

我其實成日行經過武士拉麵，一係佢就好多人排隊食，一係好多次因為水質問題， 拉麵店要停開， 拉麵餐廳其實個湯底先至係重點。呢間拉麵其實好重視佢既湯底，所以見d水唔乾淨，佢就唔開，由此可見，佢地對個湯底都會係好有心機。今日有幸食到都幾Good。

鹽味豬骨拉麵 ($88)

屋子生活 (環境正野食麻麻)

係大圍附近有一間叫屋子咖啡，之前因為長年累月都好多人去排隊加上鋪頭勢頭勁， 所以佢擴充營業，係統烏溪沙開另一間分店，叫屋子生活，佢開鋪初期都已經超多人去幫親，星期六日去更加要排隊接近半個鐘以上先有位。呢間野相對屋子咖啡黎計已經大間左好多。

實情係呢間餐廳都係Sell佢既環境裝修， 首先具有塌塌米，加上佢的裝修同牆壁上都有想過度過，有好多靚既擺設，加上吊燈裝飾，影相都幾靚，你可以用Cafe黎形容佢，所以野食方面大家就唔好咁大期望。

人均消費：HKD$87

世界の山ちゃん (日本雞翼店)

人均消費：HKD$92

山哥夢幻雞翼係日本超出名，佢既分店多到好似香港既譚仔咁，佢出名既就係雞翼，但佢係尖沙咀開分店時宣傳唔多，所以人流都唔係太多，佢既雞翼其實都唔係有好多隻48蚊得四隻， 平就唔係平架喇，不過勝在野味。

今次推介 ─  夢幻雞翼 ($48)

一遊日本料理 (壽司刺身也厚切)

人均消費：HKD$97

近日都好多人講緊既合和自助山重開，book 檯要等到6月，我就book 唔到，其實合和都有好多好野食，呢間叫一遊既日本野，佢個午餐都唔未到商務價錢，但就勝在野食唔差，應該同另一間叫一門係好朋友。佢個餐牌同野食款式都係差唔多。其實兩個女仔share 一個lunch set 都可以。

呢間野晚市食，你預$200一個人，幫襯Lunch 都係$100，咁又未嘗不可。

壽司拼盤 ($97)

拉麵來 (食拉麵都係靠濃湯底)

人均消費：HKD$88

食拉麵，大家可能仲食得多過我。好多拉麵店都因為太多人食，所以夠錢開分店，好似豚王咁，開分店多到開到4間，湯既quality 差左就一定啦，話晒D湯一日要有咁多豬骨去煲。拉麵來都唔例外，好在既係拉麵來只係開左一間旺角分店，不過都quality 都係總店可取，D湯都仲係好似之前咁濃。

第二，裝潢都好重要，拉麵來入面都有好多日本擺設，好似日本煙盒，日本玩具，at least 你會feel 到佢有heart 去執過樓面，話需佢間舖唔係好大間，但少少既執一執已經差好遠。

拉麵，最終都係講到拉麵碗麵。

今次推介 ─ 金湯底

巨一麵堂 (專家牛舌)

人均消費：HKD$90

我自己都幾鐘意食牛舌，之前行過油麻地味皇，佢門口有一個餐版專係食牛舌，可以有4種食法，但講牛舌肉身黎計，點都唔及巨一麵堂。牛舌好食既地方係佢又唔係好腍又唔係好硬，半腍半軟就最Perfect。好多地方都整到好腍，咁就無左咬口，尢其係湯上既牛舌，今日既巨一，佢就唔係好大問題，佢話晒都係以牛舌出名，食落係湯上都可以整到好好食。

牛舌拉麵 ($94)

豚兵衛 (平價又一般日式吉列豬扒)

人均消費：HKD$90

平時想食日式炸豬扒飯，大大話話都可能要上$150，又可以任加配菜加上環境又好D同食野既人數又唔係好多，等你食得開心D。但人窮既時候，又想食豬扒，呢間勉強可以幫你抵住豬扒癮。你又唔好同其他貴價炸豬扒比，咁樣又太唔公平，所以只可以講，呢個價係Average。

間舖都唔大間，話晒都係尖沙咀，租都唔平，但就真係超細間，坐得勁唔舒服。

吉列豬扒飯 ($85)

Dazzling Cafe (又一間台灣甜點)

人均消費：HKD$92

講下Background 啦，佢呢間Dazzling Cafe就係見到咖啡弄係香港咁成功，咁就過黎開間分店，賺下港紙啦，又好驚衰，所以就係香港「試業」，時間就好多時去到下晝五點就收皮，想幫襯都唔易。佢呢間Sell 都係Sell 吐司盒，又少少似茶木，但一定好食過茶木好多，話晒都係正宗台灣野。

佢呢間寸咀野當然乜都寸D，服務員都要講普通話，但如果見到台灣妹講普通話，你都可能唔會太介意同佢地講幾句。排隊方面就無tips，都係早D去拎飛，之後再去行街，半個鐘左右返去一次，咁就差不多，一日派250張飛，walk in 係有，但唔sure你有無檯。

再者，佢又係好似咖啡弄咁迫你Order 野飲，一入門口已經同你講左，仲問你有無問題，好明顯佢就係驚你唔Order 野飲，又驚犯左商品說明條例。超高招，搞到即時要叫野飲。

今次推介 ─ 蜜糖吐司 ($85)

盛八食堂 (蛋之食店)

人均消費：HKD$98

講起蛋包飯，好多人一定食過，有泰式又有日式。泰式就個蛋皮出名薄，所以價錢就平D。日式既蛋就Rich D ，個蛋汁就未全熟，都幾好食，價錢相對就貴D，天后都有一間出名既日式蛋包飯，佢可以賣到$150左右。今次我食呢間，都叫做有兩間分店，唔係太多。水準都ok。

今次推介 ─ 吉烈豬扒蛋包飯 ($98)

The Flying Pan (24小時營業蛋店)

人均消費：HKD$95

The Flying Pan 其實中環同灣仔都有，今次食完全係因為飲完酒轉場，想搵d野食，咁arm 上forum search 過，呢間The Flying Pan 係出名食蛋仲要係24小時營業，適合夜鬼。我地話晒都想搵個地方吹水同食野。眼見都有好多食Post 話班尼迪蛋好食，但我呢d乜都會試一餐既人，都係食個Omelette，試下同Comment 下。

我一行三人去食，我朋友都叫左班尼迪蛋，但我就叫左個牛柳奄列+牛角包+豆+蕃茄湯。呢度個奄列都唔係好蛋Feel，可能外國人對蛋既要求唔同啦，佢地既蛋入面都加左d芝士，令你食完個All Day Breakfast都唔會好肚餓，話晒d芝士都好膩，所以飽就一定夠，但我就覺得個蛋都唔及日本人整蛋方面，不過之一個Breakfast黎計都ok。個蕃茄湯先係好野，你係香港飲既蕃茄湯一般都好hea，但呢個蕃茄湯好足料，蕃茄係用原個蕃茄打碎再煲，好多雜質，好有口感，下次不妨一叫個蕃茄湯。

Philly Omelette ($86)

富山麵家 (Bathing Ape主題拉麵)

人均消費：HKD$95

限定日期：8月3日至18日

呢期D人仲係咁講話食一蘭，細佬已經係開張一周內光顧，發覺先食先開心，今次都唔例外，見到有人Post 左出黎富山麵家同Bathing Cross Over 搞拉麵，我見今日係第一日，我又點會唔食啦。話晒Bathing Ape 咁多年都咁受人歡迎，而IT都收歸旗下。可見Bathing Ape既吸引力。今次呢個Cross Over係期間限定兩星期，過左就難有Special Bathing Ape 既Display。

今次食既富山成間野都好似為左Bathing Ape 而設，牆、餐具、紫菜皆為Bathing Ape，好入左去就有如罝身Bathing Ape 專門店。環境：(thumbs up)

內容，富山拉麵東京拉麵祭最強銷量拉麵勇奪第一位，我當然會試下。咁我自己一定會比較下佢同正宗日本拉麵既分別。正宗日本拉麵既特色係比較油膩，麵身較粗，一隻溫泉蛋開邊。睇番下圖，條拉麵都幾粗身，加上個湯都有油油地，食落就更滑，佢麵身比較硬身，有咬口。講埋舊叉燒，肥瘦好均勻，Good。(kiss)

但佢都有敗北之處，就係佢無得俾個客人自己揀食咩麵質同油度。如果有得揀會更好。(waiting)

豚骨蒜頭拉麵 ($85)

一蘭 (濃豬骨湯拉麵)

人均消費：HKD$89

銅鑼灣人成日都話都食拉麵先開心，見到一蘭落戶香港，即時想去一試，佢仲要24小時開放，食材仲係日本空運到港。無理由唔試下。日日睇Facebook ，已經有朋友食左，仲話要排幾耐幾耐咁，終於俾我知道點食一蘭係唔洗排隊既時段係星期一至五7:00am-10:00am，我就見今日係書展第一日，食完去行下。聽聞之後既食材會係香港製造，所以如果想食就要襯早。

先講差既野先，其實都有幾多樣(broken heart)
1) 一蘭佢出名既野包括半熟鹽煮蛋、黑木耳、醋、紫菜全部都要加錢，唔加錢都要$89埋單，加埋要過$100。
2) 麵底超細碗，一個正常人根本係無可能食得飽，你預要食兩碗先夠飽。
3) 叉燒得兩小片，係超薄片，仲要唔香豚味，如果俾三四片都好少少。(可能想話你知師傅刀功好....)
4) 個Layout好似自修室咁，好難同朋友一齊有傾有講，不過日本都係，所以算。
5) 香港既一蘭唔同日本有部自動售賣機，要係填紙仔。
6) 以一個咁既價錢，想碗好既拉麵係香港有大把選擇。

咁都有咁多人食，佢都一定有佢既原因。好似佢個極濃豬骨湯，佢一食落好似好咸，但佢係用濃豬骨煲成，唔係用味精。我食完兩個鐘內，都唔覺得要勁飲水。個湯又濃，又香，又滑。入口唔油膩。正。佢應該係sell 個湯底，其他野可以去第二間食。(applause)

湯的濃度、油膩度、香蒜、蔥、叉燒、醬汁、麵的硬度全部都可以有得揀，你可以就住自己既喜好去揀。

另有指南教你點食，好細心。(cool)

一上檯賣相好普通 ($89)

隆姐泰國美食館 (泰國風味)

人均消費：HKD$95

想食泰國野唔洗一定要去泰國，係香港都可以食到好既泰國菜。如果你係食得辣之人就更加唔洗講。我自己食泰國菜多數都會叫生蝦食。事關d泰式生蝦醬先係焦點所在。非九龍城既泰式生蝦醬食係有落適量或少許紗糖。而九龍城既泰式生蝦醬係用香草，我食兩啖，辣味已滲透出黎。醬先係一絕。

平時去City Super, JUSCO, 買生蝦，大約$3.5~$5/隻。話雖同食肆食可以平一大截。但係九龍城食就有泰國人既生蝦醬，咁已經值回票價。出面生蝦及雞醬多數係紅紅地色，但呢間係青青地色。食落就知正野。第一啖唔辣，但d辣係慢慢滲出黎。堅。一定要食(love struck)

生蝦 ($80)

住家菜 (銅記中菜) (已結業)

人均消費：HKD$95

宜家出街食野，晚餐好多時會分兩輪，有頭同尾輪，所以出街食飯宜家都搞到好趕時間。呢間住家菜都係咁。

南瓜排骨盅要預早一日訂的，又睇得又食得。相當抵。個瓜好林，一切就開，入面係醬燒排骨。南瓜盅同冬瓜盅原理差唔多，都有互補不足兼鎖住肉汁。加上南瓜整到好林時，南瓜亦自自然然吸左排骨醬。兩者相輔相成。佢個Design 就係要一刀切開，但由於個南瓜好腍，一打就開。正