鮨一日本料理 (太和日式小店)

人均消費：HKD$70

行完山後最好就係食番個正飯最好，一係出大埔，一係出太和食。其實太和火車站附近翠怡街成條刦都有好多野食，呢一帶翠怡街都係小店居多，有茶記同呢間日本野，呢層我最Like。宜家正值夏天，食乜都唔係食好多，食少少就飽，食日式野就最好不過。D野又唔太熱。

今次推介 ─ 花什錦魚生飯定食  ($58)

天天旺 (超足料魚生飯)

人均消費：HKD$45

我寫左咁耐野，發覺寫日本野係最多人睇，有見及此，我都唔可以忽略呢個菜式，今日我就搵到去太子，呢間野一睇個Menu ，我即有衝動去幫襯，佢就係可以Dinner 做緊$45，仲要唔洗加一，咁仲諗乜，心動不如行動。呢間野其實佢有兩層，一層做放題，一層做散叫，佢既放題要成$298，都係貴，俾我就食大X屋。不過散叫就堅平，$45都有交易，唔收加一。

今次推介 ─ 什錦碎魚生飯 ($45)

我就叫左個什錦碎魚生飯，有前菜沙律同魚生配飯同飲品。佢個魚生先係勁，好似完成唔洗錢咁，有蟹子，三文魚同吞拿魚勁肥美，個飯既份量都好大份，我都係一個大食既人，我食完都覺得好飽。

佢散叫既座位唔係咁多，同埋佢開個冷氣開到好凍，如果要去就記得著多件衫。

壽司屋 (入口即溶火炙壽司)

人均消費：HKD$69

呢間餐廳其實我上次食對面華記時已經有留意佢，一間小店，但佢既客人唔少，lunch 時間都會有好多人排隊去食，我一上openrice 一search 之下，就見到既係無劣評，加上有人龍既多，通常都唔會死錯人，我一食過，之後一定會再幫襯。

一間小店，佢樓面細，只可容納十個人，如果你坐Bar 檯，你仲可以睇住佢點整野食。加上食落就知佢大件夾好食招徠，好似日本小店，一邊睇住師傅整，一邊食。呢間野既三文魚刺身，佢又唔係太貴，$35有4片，每片都唔係太薄，都算厚切，足料既。而佢火炙壽司又入口即溶，已經好正，如果齋食以上呢兩樣野，都係講緊$55，但入口溶化既feel，絕對唔同講法。

今次推介 ─ 火炙左口魚壽司 ($20)

一遊日本料理 (壽司刺身也厚切)

人均消費：HKD$97

近日都好多人講緊既合和自助山重開，book 檯要等到6月，我就book 唔到，其實合和都有好多好野食，呢間叫一遊既日本野，佢個午餐都唔未到商務價錢，但就勝在野食唔差，應該同另一間叫一門係好朋友。佢個餐牌同野食款式都係差唔多。其實兩個女仔share 一個lunch set 都可以。

呢間野晚市食，你預$200一個人，幫襯Lunch 都係$100，咁又未嘗不可。

壽司拼盤 ($97)

日和號 (足球小將主題壽司)

人均消費：HKD$48

限定日期：8月10月

足球小將都係一群80後細個時追看既漫畫，戴志偉永遠都係神級人物。所以今次聽到有間餐廳夠薑做足球小將既主題餐廳。我又點會唔去呢，話晒MegaBox都唔係好遠，去到，日和號成間野都好似為左足球小將而設，D布置都做到好足，有特式Menu列車，車箱，餐紙，餐巾，紙牌公仔乜都有。未食已經開心死左，好入左去就有如罝身足球小將歷史館。

平時成日行街都會經過，佢Sell壽司，仲有宵夜Discount，但都唔會入去，如果唔係今次去左，我都唔知幾時會去。因為佢宵夜做買一送一，平時就無咁平。我呢D窮人都會睇時機先去幫襯佢。

呢餐好明顯係俾部相機食飯多過俾人食飯，見到佢有個足球小將Menu，但一D都唔吸引。我只好睇番正常Menu，一個Lunch Set $58(包一個主菜+個手卷同杯野)貴就真係唔算貴，話晒都俾左咁多野食出黎，呢個份量都夠1.25個人份量(big hug)。手卷隻炸軟殼蟹係凍既，佢既野食係超一般，你以和亭Quality。

軟殼蟹手卷

金田長壽司 (新鮮大件壽司)

人均消費：HKD$77

尖沙咀區一向食日本野都唔會平得去邊，但要搵間大件夾抵食就難上加難。今次我去左金田長壽司，佢個名係「金田   長壽司」，出名既野就係長壽司，仲有佢收得你$10，真係俾番$10貨你。我今次一行兩個人，所以叫野唔多，因為佢個Menu 有圖片，佢既圖片唔係寫僅供參考，而係寫圖片大細乃實物大細。再望下隔離檯，佢叫左個巨型火山卷，我都諗住叫，但本住試多d野，我就叫左2件八吋三文魚壽司同一客珍寶帶子皇壽司 (兩件) 。試下佢個刺身。

佢唔好處係限時個半鐘交檯，佢上菜都好快，驚你唔夠時間食。好彩係我趕住睇陳奕迅演唱會，佢唔吹我交檯，我都唔會坐得耐。

今次推介 ─ 珍寶帶子皇壽司

先講個珍寶帶子皇壽司先，隻帶子好大隻，佢大細都有成兩個$10銀咁大(見下圖)，一啖當然食唔晒，入口都好新鮮fresh。正(love struck)

八吋三文魚壽司其實都好長同肥，佢收$12，真係俾足$12既貨俾你。(tongue)

八吋三文魚壽司 ($12/件)

正村壽司 (雙色豉油)

人均消費：HKD$40

有時食野，睇住食tea 既時間去食，分分鐘可以慳一筆，有D tea 會做到5:30pm 先完。有時當埋晚餐都仲可以。呢間正村佢個Selling Point 唔係野食度，而係豉油。

佢Lunch 都唔係好貴，一個魚生飯$50左右。唔算貴，可以接受。但一到Tea 就死直，我當日光顧之時，我係佢唯一檯客。服務一流，一食完，佢十秒唔夠就收左隻碟。所以佢Tea Set 做緊個Promotion 係買二送一，買兩件壽司送多一件。變相平左少少。我兩條友去到，食左15件壽司就捧住個肚走人。

豉油點特別法，在於昆布醬油色澤較淺，入口較清淡；相反，吟嚷醬油色澤較深，入口略咸。佢亦俾夠兩隻豉油碟你自己Mix and Match。

昆布醬油 同 吟嚷醬油。

一鮮刺身壽司 (新插旗天后日本外賣店)

人均消費：HKD$45

間野新開張，我本住打死罷就去試下，叫左個壽司Set 試下，10件壽司+1罐可樂都係賣緊$45，以外賣店黎計唔算貴。一個Lunch 都唔算太貴，係天后清風街同電氣道一帶已經好多野食，呢間野連Openrice 都未有資料，好新，佢仲要個價唔係好貴都可以係天后插旗。所以值得一試。

大盛日本料理 (人山人海日式料理)

人均消費：HKD$40

我成日周圍咁去食野，你可以問邊間最好食，最好食都係相對。觀塘區自重建後已經無左好多好食既地方，就好似新南苑，全部都死於重建。不過點都好，無乜野食都總會有DD好野食。觀塘道近年最多人排隊既食肆，大部份係日式。佢咁成功，某程度上係佢market 做得好。因為佢用一個平既價錢去吸引你，翻單仲有9折，所以成日都有好多人排隊。

我平時行過或坐車經過，大盛長年都好多人等位。今次專登揀係下晝兩點幾入去，係因為真係想試下佢有乜板斧，我先叫左個文魚壽司同豬軟骨拉麵，一食左個三文魚壽司就知佢點解成功。

今次推介食物 ─ 三文魚壽司 ($18)

Spicy Lips (韓國街頭小食)

人均消費：HKD$28

出去荃灣想食平野真係唔難，但有時食得太次都唔係太想又食。今次發掘左間韓國街頭小食店，店主同老闆娘都係韓國人，落單時都係要講英文，但我盲字都唔識多個，我都係指俾佢睇要乜。

韓式紫菜壽司飯團 ($28)

一門 (絕世好蛋)

人均消費：HKD$105

如果你係陳奕迅Fans，一定聽過黃金廣場，呢間野就係黃金廣場入面，但唔好俾陳奕迅呃左，呢個商場一d都唔旺。全座野都係都係食野，佢既裝修一D都唔 hea，燈光有少少暗淡，都幾有feel。

去之前仲要Book 定檯，因為佢都好經常好Full，仲要分埋時段，好似大喜屋放題咁，6:00~8:30一場，另一場就8:30~收工，所以如果你想食都最好約左人，知道大家時間先好Book，因為有D人唔like 食咁夜，太早又未放工。呢間野既唔好處都係咁既。

去得咁有情調既餐廳，你預$100左右啦。

蟹肉厚燒肉玉子 ($55)

佢既玉子就超軟滑，唔同係澳牛食既蛋，玉子佢用湯煮過，滑到都唔識形容。加上佢又夠厚身，一層層咁食，都超開心。蟹肉就不過不失，俾個玉子蓋過晒。

三和田日本料理 (香港第一代放題)

人均消費：HKD$138

唔收加一，限食兩個鐘，香港第一代放題，又係歷史野。但唔講唔知呢間野D野食唔係好特別，但依然可以生存到。但佢Sell 三文魚同任飲酒。