屋子生活 (環境正野食麻麻)

係大圍附近有一間叫屋子咖啡，之前因為長年累月都好多人去排隊加上鋪頭勢頭勁， 所以佢擴充營業，係統烏溪沙開另一間分店，叫屋子生活，佢開鋪初期都已經超多人去幫親，星期六日去更加要排隊接近半個鐘以上先有位。呢間野相對屋子咖啡黎計已經大間左好多。

實情係呢間餐廳都係Sell佢既環境裝修， 首先具有塌塌米，加上佢的裝修同牆壁上都有想過度過，有好多靚既擺設，加上吊燈裝飾，影相都幾靚，你可以用Cafe黎形容佢，所以野食方面大家就唔好咁大期望。

人均消費：HKD$87

世界の山ちゃん (日本雞翼店)

人均消費：HKD$92

山哥夢幻雞翼係日本超出名，佢既分店多到好似香港既譚仔咁，佢出名既就係雞翼，但佢係尖沙咀開分店時宣傳唔多，所以人流都唔係太多，佢既雞翼其實都唔係有好多隻48蚊得四隻， 平就唔係平架喇，不過勝在野味。

今次推介 ─  夢幻雞翼 ($48)

好媽媽台灣館 (可以一試再試台灣小館)

人均消費：HKD$39

旺角就愈來愈無野好野食，要搵食就向深水埗方向，貴租都仲未殺到過去，遲D就難講，呢間野點解平，間舖係自己，同隔離金鳳係同一個老細，唔怕貴租，佢又想整下台灣野食，所以就開始黎搞，佢午餐仲平，不過我晏晝就去左隔離金鳳鋸扒好過。

佢呢個老細話就話係台灣番黎，野飲方面都有好多種，不過我自己就唔係咁buy，野食就真係好食，個炸雞扒，唔會炸到好似豪大大咁乾身，都唔錯。

香酥大雞扒+大魯肉飯 Set ($78)

佢一個Set 咁叫，抵食好多，一件大雞扒+大魯肉飯仲有一杯野飲，如果兩日人食都ok。首先講件大雞扒，個Size 都唔細，佢都幾大塊，開件都五件咁多，肉質都嫩滑，唔鞋身，炸粉唔算太多，剛剛好。佢有一半係多炸粉，另一半就唔係咁多，平衡番都幾好，唔會好似豪大大咁多炸粉，同呢間既炸雞唔係炸到好老，所以入口都幾滑。外層係炸粉，內層雞肉鮮嫩，呢我幾鐘意，肉質估大多數。

燒肉の牛太・本陣 (燒肉$110有找)

人均消費：HKD$108

平時食個燒肉，無二百蚊落樓都幾難，但係你識搵特價優惠既時候一百幾十蚊都可以有交易，今日我去左燒肉本陣。佢每個月既29號都會有若干款式燒肉作出半價優惠，平時一百蚊嘅燒肉， 可以做到49蚊。你食幾多，佢又無限你點幾多， 食完之後可以再點。

佢豬肉就得豬頸肉，雞就普通雞肉，牛先多少少選擇，但都唔係好hea，佢既雞同豬肉都係半肥瘦，d肉都腍，但就肥左少少。相反，佢既牛肉有驚喜，就係牛肋肉，$34有5件，佢燒一燒就食得，又唔勒

德發茶餐廳 (男人的浪漫三十有找叉飯)

人均消費：HKD$29

呢期係睇花同睇景既高峯期，我就係照樣搵野食，行開呢邊，咁就Openrice 下附近有咩好野食，就係保安道市政大廈，有間清一式「好評」既大排檔，一上到去，就見到個價錢，$29個Lunch ，睇完我都唔係好信自己隻眼，望多三眼先敢坐低。

宜家係香港想食平野，熟食中心係宜家都仲可以平平地咁食，都係因為D租都仲係政府收，又唔會收得太貴，其實地方都唔係差，有部份仲有埋冷氣，但保安道都未有冷氣，宜家都未係好熱都仲可以接受，遲d六七月就熱到HiHi 咁。

叉燒蛋飯 ($29)

Starz Cafe (食環境但野食一般)

人均消費：HKD$70

半年前，Dazzling Cafe 係THE ONE 開左之後，茶木又係咁開分店，佢地既共通點都係脆多士，都唔係好多間做得好食，多數台灣過黎香港開分店既都唔差，反而有D明星開既都係一般，佢地都係Sell 明星既名氣，佢地既優勝之處在於佢地係旺區有舖，同埋佢地既宣傳就真係做得幾好，但野食佢地就唔係好刖重，反正你都入左去，點你都要食少少野。

呢間野門口貼晒好多明星相，話埋俾人聽你係邊個經理人，環境係一流，白色做主題，加上無客，談情一流，野食就算啦，睇埋落去啦。

脆身吐司(朱古力)味 $70

ICONIC H (不外如是的Hard Sell芝士熱狗)

人均消費：HKD$45

紅磡左名既有時新，附近都有一間出名熱狗既外賣店，佢出名在於隻熱狗加上芝士醬同雞蛋，成隻狗就即時rich 晒，不過睇番個價，佢都講緊成$40~$50一隻，貴就貴，食物一般。但一到星期六日就勁多人排隊，如果想食就最好平日去食，起碼無咁多人去，呢個係重點。

另外，我去到，佢勁Sell 我Order 第二款包，但我個心好堅定咁想食個芝士蛋熱狗，但條熱狗腸都係俾佢Sell 到。算啦，個Sales 咁Hard Sell，如果你係有左心水想食乜，你千祈唔好俾佢Sell 到，因為佢會用幾分去Sell 你Order 佢既野食。

紐倫堡熱狗 ($45)

韓國媽媽 (即叫即整地道韓食)

人均消費：HKD$53

係香港食韓國野，宜家主要都係食烤肉，但又咁講，韓國其實都有好多野食，唔係一定開係尖沙咀韓國街(宜家都差左好多)先有得食，一D小店都唔錯，即係好似你去到韓國，你都未必會去大型商場食同一道理。

呢間小店位處旺角附近既大角咀，呢區平時食野唔太貴(相對旺角)，交通又方便，約人又容易，所以我都幾鐘意呢個小區。今次呢間野既優勝在於勆既紫菜飯卷，佢好似韓國整法，紫菜同紫菜中間係有個空隙，但又同日式小卷唔同。

呢間野係小店，佢會係係面前整野食，每個Step 你都可以睇到，佢落幾多油，你都一清二楚，好有家庭Feel。

今次推介 ─ 紫菜飯卷 $25

一遊日本料理 (壽司刺身也厚切)

人均消費：HKD$97

近日都好多人講緊既合和自助山重開，book 檯要等到6月，我就book 唔到，其實合和都有好多好野食，呢間叫一遊既日本野，佢個午餐都唔未到商務價錢，但就勝在野食唔差，應該同另一間叫一門係好朋友。佢個餐牌同野食款式都係差唔多。其實兩個女仔share 一個lunch set 都可以。

呢間野晚市食，你預$200一個人，幫襯Lunch 都係$100，咁又未嘗不可。

壽司拼盤 ($97)

Pizza Maru (食炸雞去KFC食仲好)

人均消費：HKD$45

一講到炸雞，好多人都會好開心咁講埋韓劇，但今時今日香港，你要食炸雞就愈來愈多選擇，但多選擇唔等於好食左，就好似今日我去食既炸雞咁，係好就腳，係銅鑼灣，但就係D炸雞唔好食囉，講番呢間野，佢主要都係食Pizza，但我就係都唔信邪，食炸雞，佢既肉質同K伯伯好似，咁唔洗點講都知係乜料啦。睇埋落去啦。

蒜香甜辣炸雞6件 ($90)

樂華邨小食 (街頭風味)

人均消費：HKD$10

每逢新年，好多香港人或者媒體都會關注街頭小食，自從桂林夜市後，好多人都好珍惜每年新年既夜市，但又咁講，其實好多街頭小食一直都存在，宜家都仲有好多走鬼會係一d舊式屋邨同埋巴士站附近開檔，就係因為人流多，所以小販都仲有生存空間。雞蛋仔或腸粉就真係好少街檔，魚旦燒賣，牛雜都仲可以係街邊食到。

樂華邨位於九龍灣淘大再上的屋邨，可能食環無咁勁，所以都仲可以生存到。

今次推介 ─ 雞腎 ($10)

Cats' Eye (滑蛋飯加滑咖喱)

人均消費：HKD$78

貓既眼睛簡稱貓眼，呢間係食咖哩，忌廉加蛋既混合餐，佢係灣仔區已經出左名，晚市既時候，好早(約六點半)就要等位，所以要食就又係早啲到。佢既蛋同忌廉以滑出名，比起出面食既忌廉或蛋都算得上係好滑。

佢有兩款肉，豬同雞，師傅已經將佢set 好左配咩汁，所以如果你想食咩肉就order 咩汁就可以了。

咖喱忌廉汁蛋包飯 ($78)

金祥排骨麵 (薄炸腐皮)

人均消費：HKD$30

西營盤周圍食，一條水街就已經好多野食，佢既食客之前都係以HKU學生同該區居民為主，但宜家真係百花爭艷，好多食店都開左，為既都係賺埋地鐵條水，話晒宜家入西環方便左好多，好多人都會入去食野，一間間老店亦都要面對挑戰，好多新店開張，留得住既老店都唔係太差，呢間出名炸豬扒，不過其實既炸腐皮都唔差。

今次推介 ─ 炸腐皮

阿元來了 (超有去左台灣Feel)

人均消費：HKD$26

呢期好多人都話西營盤開左間台灣野，一心地鐵仲未開通，好快D去試下，因為西營盤站一通車就大把人去，加上好多網上既人都討論緊，所以我會加埋今次既搵食心得。阿元來了最好幫襯時間係下晝兩點半至五點半，因為蚵仔煎既供應時間係下晝兩點半至五點半。 其他野食就係全日供應， 所以如果你想食埋蚵仔煎，最好睇清楚時間， 加上佢既野食好快就賣晒，下晝六點就可以收工，簡單d講，下晝去啦，講完。

呢間都算得上係台灣野既食，佢既整法都係比較台式，

今次推介 ─ 魯肉飯 ($27)

苑記粉麵茶餐廳 (好食過酒樓既腸粉)

人均消費：HKD$17

去大埔食玻璃腸粉，其實都係得陳漢記，但周六周日成鬼日都好叉多人，你唔想排既話，隔離有間苑記，佢都係食腸粉，聽大埔既朋友講，呢間都幾出名，咁就去左試下，一試就知佢既腸粉無陳漢記咁薄，但相對其他既酒樓黎計，佢又的確係滑同薄，但餡料就少左DD。佢呢間餐廳所提供既野食，同隔離都係差不多，都係煲仔飯腸粉，但因為質素上點啦.....所以就少D人囉。就係咁

鮮蝦仁腸 ($17)

平成二十二日本料理 (午市刺身飯都係腩位)

人均消費：HKD$58

一間平時做開放題既舖頭，唔好以為佢齋做夜晚生意，日頭去食反而仲有驚喜。平時一個人食放題要成$238一位，但lunch 既時候，你既可以選擇單點Lunch Set，佢仲要唔加一服務費，Menu 睇幾多就收幾多，最貴都係$60有找。日頭都維持到超高既水準，分分鐘好過放題時段，佢既魚生飯直頭係推介。

今次推介 ─ 平成魚生飯

大隻佬麵家 (大隻佬一定唔夠食)

人均消費：HKD$29

上排見蘋果日報寫話太子有間雲吞麵舖大隻佬叫大隻佬，老闆係大隻佬，但好似不敵貴租，之前執左。事隔一排，老闆個細佬係旺角又開番檔，咁就當然食下佢啦。我之前未去太子大隻佬，咁第一次去，當然有少少期望。話晒蘋果日報唔係咁易幫你宣傳，見你重光，俾少少錢，幫襯下你。

雲吞麵 ($29)

小紅館 (荃灣靚裝台灣野)

人均消費：HKD$52

水貨客攻港都已經唔係咩新聞，沙田，元朗，屯門，上水，荃灣即將變天已成事實，荃灣廣場附近多左好多新野食，等強國人去完商場鳩嗚後都有D野食。商場就已經係大牌子野，想食野就出去隔離睇下，呢間小紅館都係新開無耐，Openrice 都唔係好多食評，芢就最好一試，話晒都叫做新野，做好個頭好重要。

今日我食個Lunch 都用左$52，係荃灣計，呢個價食個Lunch 都叫做貴左DD，但佢Dinner 個價仲要貴一截，所以如果你想試佢既野，不妨集中試一味

今次推介 ─ 鹽酥雞球

康記粥店 (老店炸一腸風味)

人均消費：HKD$25

今日黎到大坑，已經係夜晚，好多餐廳都已經閂左門，得番唔多餐廳有得揀，再上openrice，一搵之下，仲有間老店，佢有佢既炸一腸，視覺上，炸一腸,炸二腸或炸兩都係一樣，但整法同口感都唔一樣。就要睇你鐘意點食喇。話晒腸粉大家都食過。講既只係focus 係有咩野出面唔多。就以下作出比較。

炸一腸 : 一條腸粉 + 一孖油炸鬼
炸二腸 : 兩條腸粉 + 兩孖油炸鬼
炸兩 : 兩條腸粉 + 一孖油炸鬼

今次推介 ─ 炸一腸

大師傅粥品 (一流腸粉)

人均消費：HKD$25

今日係光棍節又見完客無野做。諗住係觀塘有野食，市建局係觀塘附近大番身後，餐廳都唔多間。一上openrice ，搵左一陣，見到上排好想去嘅大師傅。佢出名腸粉，在於佢皮比較薄。呢間野係大角咀同觀塘都有分店，咁就係呢間。腸粉皮既厚薄，都係因為個師傅落米漿多與少，太多的時候豬腸粉皮會好厚好實，太薄既話，一夾就散晒。香港其實都有好多好食既腸粉，呢間會係我會番食既一間。

今次推介 ─ 叉燒腸 ($15)

茶家 (蘇豪區綠茶)

人均消費：HKD$48

上環半山係近期一堆偽文青搞出黎既地區，出產好多野食，例如咖啡coffee shop, bar, design and desert。 今日我去既茶家，之前睇報導話佢係由一個律師放棄高薪厚職出黎開既餐廳， 仲要搞間呢期好heat 既綠茶，我當然一試。

香港人好多都係一窩蜂去食， 所以在等位方面上都要等一些時間我今次都等左半個鐘， 但可能因為我太晏先去，所以好多野都買曬，我唯有食個綠茶芝士蛋糕。如果大家想食不妨早一d出發。

綠茶 Cheese Cake ($48)

深仔記 (又一間中下既雲吞麵)

人均消費：HKD$24

我之前其實係咁不停咁試左好多間雲吞麵店，歸納出雲吞好食之處在於，雲吞餡料、麵質同湯。雲吞餡料即係豬肉同蝦，以蝦計，隻蝦要係中蝦同埋唔可以梅，要夠新鮮；麵質比較上係爽口彈牙，如果用上竹昇麵就仲好；湯無咁容易出鹼水。價錢亦都唔可以太貴啦。

雲吞麵 ($24)

德美壽司 (超足料日式Full Lunch)

人均消費：HKD$79

日式便當or 餐盒，由前菜到甜品到餐飲，五道菜野，樣樣都做得好好食，又唔馬虎。一餐分別有薯蓉，溫泉蛋，薑，螺肉，魚旦，蘿蔔，雞蛋，炸豬扒，三文魚刺身，北寄貝刺身，蟹柳，白飯，豆腐甜品，同餐飲。有咁多樣野食，連加一都係$80有找。如果食晚市，呢個價都可以係話Mission Impossible。

我之前都有講過，話如果一間餐廳係好食，但你又唔想貴的話，食Lunch 啦，星期六日，早少少起身，做完個運動就去食，呢個未嘗唔係一個既可以慳錢，但又可以食到好野既方法。

今次推介 ─ 德美和食便當 ($79)

永華麵家 (無得輸的炸醬撈麵)

人均消費：HKD$52

今日Halloween，去中環食都唔係好多選擇，同埋又封路，如果想搵間好食少少既餐廳，可能要去到PMQ，咁中環附近得灣仔先多平少少既選擇。咁就去間位於灣仔既老牌雲吞麵店，佢最出名都係撈麵，我今次就食左個炸醬撈麵，承惠65個大洋，佢Size 唔大，只可以話係剛剛好，不過堅好食同足料。

今次推介 ─ 京都炸醬撈麵 ($65)

Initial Ice Cream Store (黑色雪糕筒)

人均消費：HKD$10

首先我份人比較窮，平時食杯雪糕都係去7仔食，仲要等星期日有時會做Promotion，$5一支甜筒，而家今次睇左都好多網上推介同店舖外勁多人排隊，期間Discount，平日做緊$18，但今日就話$10，你食杯富豪雪糕車都要$9既時候，呢杯野又真係接受到。

作為一個窮人，想食平野時，你都可以留意下佢有無做Discount，話晒佢宜家都咁Heat，長做Discount都唔出奇。行過就昅下佢幾錢，做緊Discount就真係可以一試，Post 上飛Book，都呃個Like。

食單球乳酪雪糕，都要$25，所以我極少食，計Gram 又要計埋個杯，你話係咪唔係咁抵先。

李家小食店 (有炸雞兼又有汽水)

人均消費：HKD$28

自從星星的炸雞配啤酒大行其道之後，成條韓國街好似多左好多客，加上太多人去韓國旅行，所以造就左好多韓國野食店都多左好多人，亦都有好多新開張既韓國食店唔單單係金巴利道，周圍都有咁，食住呢個熱潮。李家堂食就勁多人，俾我都唔會排，見佢隔離有檔小食店，都係賣炸雞，咁先食佢。佢個價差距好大，炸雞可以賣到成百蚊，我幫襯番個$28既炸雞杯就ok喇。仲要外賣店，無位坐，唯有企係門口食。

今次推介 ─ 炸雞杯 ($28)

特別提醒，記得問佢拎隻手指套，咁食法唔單止唔會整花手指甲，又唔怕未洗手就食野。

泰樂廚 (尖咀平價生蝦) [已結業]

人均消費：HKD68

宜家係香港想食生蝦都係一件好方便既事，去AEON 或SOGO 或其他專門店都唔難買到。但你一買就買一pack 就好多隻同埋要解凍加上你又未必有好食既泰式辣醬，唔通去M 當當拎咩。出街食就貴D，但勝在無乜手尾跟，如果同你講，一碟6隻生蝦都係賣緊$38，你可能會話我會唔會收番茶芥，但今次呢間係$38就有6隻，剛剛好可以俾你頂癮

必食推介 ─  生蝦 ($38)

鑽石冰室 (屋村老店)

人均消費：HKD$30

你講起一D老店，係香港老店有部分都係未重建既屋邨，今日我就去左彩虹邨，彩虹邨入面有一間叫鑽石冰室，鑽石冰室其實已經開業數十年，一直都係做邨民生意，佢有舖入面有住新既裝潢，但檯檯椅椅都係用番幾十年前既。佢暫時都仲未俾時間巨輪沖洗，仲可以生存。其實彩虹邨入面既食肆都好經濟。

滑蛋叉燒飯 ($30)

Jimmy's Coffee (休憩Coffee Shop)

人均消費：HKD$64

係旺角上Cafe，成日都好多人，D野食好難食，呢D經驗相信大家都遇唔少，一個set 都要$60~$70都係好平常，佢預左你有排坐，所以先咁貴。但凡事都會有例外，今次既窩夫真係有quality，Jimmy's 個窩夫同出面比較(咖啡弄除外)，佢既外層都叫做有番少少質感，唔會太好就林晒，啱晒坐得耐既客人。我今日出人意表咁叫左個咸味既窩夫，但都係唔得。窩夫配雪糕係最正的。

蘑菇窩夫 $64

個蘑菇都係普通野，配上窩夫就唔係好夾，如果你下次去的話，可以食番雪糕。

華嫂冰室 (多士烘底正絕香港)

人均消費：HKD$28

為左一份好食既多士烘底，你可以等幾耐，我既答案係兩個鐘。

今日我食左華嫂冰室，呢間野又係好野，佢既路線有少少似中環既勝香園，食都係食包同蕃茄麵。之前吹BB既〈愛我請留言〉去左勝香園拍，搞旺左勝香園，宜家星期六去等位都係要等好耐，華嫂冰室仲寸過佢，成日休息，如果想去華嫂，咁就最好上左佢地facebook check 左佢地有開先好去。

華嫂冰室附近其實可以行既就係屏山文物徑，苦悶程度係幾多就貴客自理，一等分分鐘係兩粒鐘，又有蚊。等位就最好帶定蚊怕水。

今次推介 ─ 芝士咸牛肉蛋多士烘底 ($19)

拉麵來 (食拉麵都係靠濃湯底)

人均消費：HKD$88

食拉麵，大家可能仲食得多過我。好多拉麵店都因為太多人食，所以夠錢開分店，好似豚王咁，開分店多到開到4間，湯既quality 差左就一定啦，話晒D湯一日要有咁多豬骨去煲。拉麵來都唔例外，好在既係拉麵來只係開左一間旺角分店，不過都quality 都係總店可取，D湯都仲係好似之前咁濃。

第二，裝潢都好重要，拉麵來入面都有好多日本擺設，好似日本煙盒，日本玩具，at least 你會feel 到佢有heart 去執過樓面，話需佢間舖唔係好大間，但少少既執一執已經差好遠。

拉麵，最終都係講到拉麵碗麵。

今次推介 ─ 金湯底

湯品小棧 (食得肉多都要平衡下食素食)

人均消費：HKD$38

本人乃一名肉食者，三餐唔埋兩餐就已經要食肉，自上星期見到大角咀呢間特色餐廳，升上openrice 既一個好少少既排名，眼見佢係食材方面都D幾特別既野，我又覺得可以一試，好似牛肝菌或松茸，你都未必知道係咩，我自己都唔知，我都係去到，見到佢個Menu ，講話食左有咩好處，佢有好大篇幅講食效。

我見完成堆文字後，已經唔知佢地有咩分別，即係好似中藥，我又唔係中醫，我係唔識分咩食物對咩好。總之食左就對身體某個部位好...下刪一千字。

你平時去食既齋舖，有報導之前講過佢地用既油係比正常餐廳仲要多，但今餐真係少油少鹽少糖，食得多咸野或味精後，食番呢餐平衡下。

黑松露炒飯 ($38)

Caliburger (半價Burger)

人均消費：HKD$28

芝士牛肉漢堡 ($28)

一個Burger，你係老麥食同出面食，個價錢可以話差好遠，但點解明知貴都想試其他野，咪就係食材同地方唔同，Post 上Facebook 呃Like 都唔止。同埋大大個Burger 既分別。

81番 (難食到震既牛舌)

人均消費：HKD$39

金鐘係一個商業區，呢句廢話就係人都知，佢呢頭返工既打工仔都成日呻無乜野食。大部份都係連鎖店，要搵到D小店，都要去到遠東金融中心，都有幾間，今日食既呢間就係新開張既81番，我見到仲唔快D幫襯，點知一食就中招了。

日式牛舌蘿蔔咖喱飯 ($50)

超薄切牛舌

Tiger Curry (辣到噴火咖喱)

人均消費：HKD$69

銅鑼灣咖啡弄就唔係咁易食到，次次食親都有排排隊，其實附近都有其他野食；上排去PMQ，有呢間Tiger Curry做推廣，見好多人食過都話正，所以今日就去正店食。見正店都係銅鑼灣，都應該唔會點差。

涮牛肉咖喱飯 ($75)

其實d牛都係一般，碟牛勁多肉，又一d都唔肥，唔落咖喱汁的話，佢實情係無味，但份量一d都唔少。一個人食既份量剛剛好。呢間野都好似食日式炸豬扒咁，白飯任添。你自己可以按照自己食幾多，再添飯，咁又包你夠飽。都係果句，你D咖喱食晒，而D飯又可以不斷係咁添，你都唔會覺得好食。

福元湯圓 (流沙鴛鴦湯圓)

人均消費：HKD$20

湯圓其實都好有意思，團團圓圓既意思，新年中秋結婚都會食，但湯圓好食既條件唔多，三樣就已經好好。一，塊皮唔好太厚粉；二，湯圓餡料足；三，就係個糖水夠清。今日去既福元湯圓就三樣都有齊。天氣凍凍地食就最正。流沙湯圓同流沙奶黃包其實都係差不多，都係要流心先好食，越流越好食。

今次推介 ─ 鴛鴦湯圓(配薑汁)

其實上文我都提左好食既湯圓要有既條件，下圖有埋花生湯圓既餡料，一咬落去，成舊花生溶流出黎。呢D先叫做流沙湯圓。佢鴛鴦湯圓都講到明係有兩款，佢既芝麻湯圓都一樣正。

椰林閣餐廳 (抵爆下午茶)

人均消費：HKD$30

之前講過想食平野，睇下你可以去到幾盡，一個Tea set ，如果唔係食湯粉麵，你好大可能要成$35以上，今日我就入左間連鎖式餐廳，椰林閣呢餐每人平均連加一都係$30有找。我唔係想講佢有點好，我只係想同大家分享一下，堂食要平，Tea Time 食，連鎖式都有一D唔係太貴，仲大碟同仲平一截。椰林閣呢個Discount 佢就話唔係好多間做，得香港仔同屯門做，咁我又覺得佢大碟夾抵食就Post 出黎。

馬來炒米粉 ($30連加一)

又即係星米一碟，佢都有D辣，但份量超多，一個人正常Lunch 唔食，留番Tea time 先開餐絕對無問題，佢又唔係好多油，料又夠多，唔呃你，有圖有真相。

紅丸甜品 (得意熊貓飯+西瓜甜品)

人均消費：HKD$78

熊貓貴為國寶，今日可以一啖食左佢，感覺上有D殘忍。呢間野都好犀利，開左一陣就已經吸引左好多人去左，我都係睇到D相，覺得隻熊貓幾得意，所以我先去。不過推介大家去之前，提左大家先，如果想食咖喱熊貓飯，要早一日打電話去預定，如果唔係好大機會食唔到，唔好睇少佢閒日，佢都好快賣晒。間野唔係開係大街大巷，如果唔係仲多人去。

今次推介 ─ 咖喱熊貓飯 ($56)

新華茶餐廳 (老店沙嗲牛肉寧捨不同)

人均消費：HKD$33

常餐 $33

一間間唔記眼既茶餐廳，仲要做左好多年，佢一定有D好野食吸引住食客。沙嗲牛肉公仔麵，呢個麵，十個香港人，十個都聽過或者食過，你Click得入黎，你都應該食過。講話好唔好食，呢個真係各花入各眼。我個人就鐘意D足料既，唔講你唔會太留意牛肉既厚薄，同埋沙嗲重唔重口味。

如果你又鐘意D老少少既餐廳，呢間都係一個幾好既選擇，呢間都唔係電影既場地，但裝修都唔係新。

小蝶 (貴價采蝶軒大翻身愈做愈差)

人均消費：HKD$120

呢期出左糧，要好好獎勵下自己，搵間好野食下。呢間野前身係采蝶軒，前身就貴到傻。轉左個名，我都諗住佢會轉一轉路線，但食過就知道中伏。我自問唔係一個鐘意細細份既野，今餐食完後就更甚。一心去金朝陽中心二期，仲諗住新開張會有新野食，點知D點心超迷你，DD肉都食唔到，粉就一大舊。

菠蘿包咕嚕肉

差之首選，一件咕嚕肉+落個菠蘿包度，個菠蘿包又細又唔多菠蘿絲，我都唔知可以點形容，到咕嚕肉，舊粉仲大過個菠蘿包，味道方面就同你去茶記食咕嚕肉差唔多，仲有機會更加咸。所以都係唔好食。

勝博殿 (日式炸豬扒)

人均消費：HKD$160

今晚一行四人去食，就係因為有恆生信用卡既Discount，買三送一，又或者四人同行，一份免費咁，折左都要成$160/人，佢Dinner Set 係比起Lunch Set 貴好多。如果你俾我揀多次，我都只會去食Lunch，因為佢$100有找，野食差不多，價錢上差好多，不過佢既炸豬扒就真係好食，Dinner 同Lunch 只係菜絲同白飯都係任食同唔任食既分別。如果又唔想咁貴又食到好野的話就唔洗Dinner。

預早Book 檯，我又唔覺有咁既需要，佢真係唔係好多客，但呢間野日本台灣都有分店，佢Sell 都係Sell 炸豬扒，佢網上都有Menu 俾你睇，我一行四人去，我都叫做試過幾款，我最Buy都係千層錦。其他既都比較上乾身左D。

Jamie's Italian (意大利米芝蓮)

人均消費：HKD$110

食野唔好預約。呢間野新開張，大把人講佢。咁我講下攻略先，好多人預左要等成四個月，等到聖誕節先有位。但我就講你知D快方法，食野唔好Book位，Walk In ，登記左自己手機號碼頭4個字，之後去行街，2個鐘後返去就ok。網上預約就算啦，好難Book 之餘仲要唔知等到幾時。Walk In 都係等兩個鐘就可以了。

米芝蓮好唔好食就好多有錢人就當佢神咁拜，我就唔Comment。呢間意大利野，佢又係米芝蓮啦，但好似D意大利粉好似煙煙韌韌咁，但我自己就未必覺得佢煙韌好，又可能覺得佢好似未熟透咁，有唔同見解。

Jamie's 係金朝陽二期，呢個新場，入伙無耐就租左俾佢，諗住會帶旺呢條登龍街，點知佢又唔洗好似咖啡弄咁排法，帶旺左其他商場，話晒要行兩個鐘，你又點會唔搵野行下hea下。

Loft Kitchen (又貴又唔好食又壞升降機既廠廈)

人均消費：HKD$197

我之前同大家提過下D廠廈，好似好平，還顧觀塘，一係就Factory 99， 一係就梅子貓舍，兩間都叫Special D，同埋就係呢間，我見呢間個Comment 都唔係十分差，所以先去。

先講下廠廈環境先，佢就一向都唔係好好，部一部升降機仲壞左，聽聞時運工業大廈升降機時不時都壞，如果你想去，又唔想死既，行樓梯啦。加上舊式廠廈夜晚行樓梯，同一個朋友去就真係唔好去喇，又陰森，又濕。總之環境就已經打左個大折扣。如果同你講埋，食呢餐要食$200一個人，你又會唔會去呢，我可以100%同你講，我唔會再去。

肉眼扒 ($358)

巨一麵堂 (專家牛舌)

人均消費：HKD$90

我自己都幾鐘意食牛舌，之前行過油麻地味皇，佢門口有一個餐版專係食牛舌，可以有4種食法，但講牛舌肉身黎計，點都唔及巨一麵堂。牛舌好食既地方係佢又唔係好腍又唔係好硬，半腍半軟就最Perfect。好多地方都整到好腍，咁就無左咬口，尢其係湯上既牛舌，今日既巨一，佢就唔係好大問題，佢話晒都係以牛舌出名，食落係湯上都可以整到好好食。

牛舌拉麵 ($94)

口水流餐廳 (發展中觀塘小食)

人均消費：HKD$25

今時今日，食碗麵都要廿幾蚊，今日等見客時見到間新野，佢講到$50有找，飯仲要任添，好似好抵食，但我又唔係十分肚餓，我都係叫左個麵。初時諗住食少少野，點知發覺佢個麵唔係好油，仲要係有得任飲冰紅茶。

呢間野都算係新開，連Openrice 都未有佢，唔多人識，無乜人去。呢D先夠新。想試新野既你，不妨一試。

今次推介 ─ 肉燥麵 ($25)

亞坤 (被坤的新加坡餐)

人均消費：HKD$54

我之前係新加坡時幫襯過亞坤，食過佢既咖央多，當然就係好好食。近日睇報紙，知道佢係香港開分店。我就即時佢想幫襯佢，但心諗，一開張一定會好多人去，佢又唔係十分十分吸引，所以我等到今日行開尖沙咀時，見到門口無乜人，咁先去食。

食後感就真係強差人意。

先講下間舖先，門口寫到明要排隊入座，我呢D成日排隊等食飯既人，唔mind，門口等，等左十分鐘，眼見超多吉位都無Waiter 叫我地入座，跟手問佢，佢叫我自己搵位坐，算。無人執檯，足足等左十分鐘，我自己執檯，我自己拎Menu 。全部自己做晒。

我叫左三樣野食，得一樣係OK。其他既就算啦。始終佢都係番新加坡好D，香港真係唔適合佢。

咖央多 ($18)

全晚最好食既就係佢，佢烘出黎即上檯，麵包都仲係脆同熱。個咖央多既咖央醬味唔係好濃，食落口唔會太甜，同唔會太油既感覺。但話分兩頭，其實我係叫左個蒸咖央包，但佢黎錯左，我就免為其難要左佢，話晒兩個都係$18。見個價無分別就算啦。但呢個風味同新加坡食到既係好大差別。

恒樂海鮮菜館 (小島平食海鮮餐)

人均消費：HKD$59

你可以問海鮮唔係越貴等於越好食，咁你就錯。海鮮貴只係佢大隻D，但新唔新鮮又係另一個問題。海鮮餐都可以係窮人俾得起，仲要貴過翠X少少，今次就係食平野。呢間野係長洲，如果你係中環入去，星期六既船費最平$13.20，來回船飛連晚餐都係$85.40，每人$90都唔洗，仲要有海景。我睇左其他人既Comment ，話多人食其實無咁好，最好就兩個人食，加上星期六既下晝六點左右，晚市唔係咁多人，個廚都整得好食D。如果想食好野，同平食，星期六既下晝六點兩條友就好食喇。

呢間野Sell 套餐，一個Set 包兩份海鮮+一個菜，收$118(免加一)，揀野食我都有上openrice睇下，但相就一般，所以唯有睇下隔離檯，好似蟶子同炒蜆都好多人食，同埋都係無乜創意既野啦，不過咁既價錢，你仲想點。

蟶子

蒜蓉蒸蟶子，份量有八件，兩個人食就剛剛好。蒜蓉蒸，個味都夠。

豚兵衛 (平價又一般日式吉列豬扒)

人均消費：HKD$90

平時想食日式炸豬扒飯，大大話話都可能要上$150，又可以任加配菜加上環境又好D同食野既人數又唔係好多，等你食得開心D。但人窮既時候，又想食豬扒，呢間勉強可以幫你抵住豬扒癮。你又唔好同其他貴價炸豬扒比，咁樣又太唔公平，所以只可以講，呢個價係Average。

間舖都唔大間，話晒都係尖沙咀，租都唔平，但就真係超細間，坐得勁唔舒服。

吉列豬扒飯 ($85)

叁去壹點心粉麵飯 (飲茶唔洗吸點心卡既舊式小店)

人均消費：HKD$40

近期熱話都係好多舊式小店都敵唔過貴租而執笠，呢個時代巨輪太恐怖。舊式食店可以做到今時今日，過得到沙士，D野食差極有個普。叁去壹係一間茶樓仔，但佢Sell 既野，可以媲美大酒樓，不過地方就預左唔可以同酒樓比。

薄扶林道，就好似彌敦道咁長，住係港島西區或南區就一定聽過經過同去過。附近仲有間大學，係邊間就係香港人都識既香港大學。但超好彩既係呢間野同好多舊式酒樓一樣，以裝修吸引，佢用食物吸引你。

佢既點心唔係分左好多個價錢，食野又唔洗吸點心卡，好多特色都唔係宜家D酒樓有。

川善茶居 (超Relax 嘆Green Tea)

人均消費：HKD$38

呢間川善都已經好出名，出名唔單單係佢既野食，仲有個環境，呢間野好多人都話可以慢慢食，一路嘆杯綠茶，一路玩貓，幾正的假期就咁hea 過左。佢就成日都好早閂門，七點鐘左近就閂，五點幾就已經唔再整新野，賣晒就收工。上環一帶都有唔少地方食綠茶，尢其以呢間最近地鐵站，唔洗上勁多樓梯同斜路。

佢間舖頭佈置到好似茶屋，有拱門，有泡茶工具同器皿，但食既野多數係綠茶產品，佢既綠茶都算係好食，所以晨早就賣晒D好食既野

Loaf Cake $38