山窿謝記魚蛋 (正宗香港仔魚蛋) (已結業)

人均消費：HKD$50

我寫呢篇野時，你睇到的話。謝記已經封左笠。我點解都照寫，唔係想呃View數，只係想講，時間既巨輪，太殘酷。將一間好食既餐廳消滅左。想為香港魚蛋作一個紀錄。我食既當日就係呢間野既Last Day。一間成功既餐廳，唔係賺到盡，我好respect 呢類餐廳，謝記營業時間係10:00am ~ 6:00pm 唔會夜市，好有家庭觀念。宜家係香港好難搵到咁有家庭觀念既餐廳。

香港仔正宗魚蛋唔係(東X西北)X記，如果你有幸，食過謝記，你都會認同。

達磨日式拉麵 (蒜蓉拉麵)

人均消費：HKD$90

拉麵熱係香港吹極都有，之前新假期直頭出本特刊去介紹香港有乜拉麵好食。大坑係個好多美食既地方，要入去食野真係要專登入去。所以每次都係有目的咁入去食野。今次試達磨，事關之前都Search 過達磨有好多名人去幫襯過，加上佢又係銅鑼灣開分店，所以先入去大坑一試。

入去之前佢就已經要排好耐隊，個Waiter 就叫你揀定食乜，一有位佢就可以即落單。就間舖黎睇，約有20個座位，所以想一班朋友一齊去試食就可免則免。因為無大檯提供。

一品豚骨拉麵 ($88)

小方糖甜品 (藝術甜品)

人均消費：HKD$38

九龍城多野食就係人都知，泰國野就最多，有時食飽飯，行一陣個肚就可以放多個甜品落肚。今次食既係小方糖甜品，成條街門口都係人龍，入到去都要睇下有乜好介紹。上網Search 左一陣，就order 左一個心太軟。

今次推介 ─  80℃暖意朱古力心太軟 ($38)

民聲冰室 (鹹蛋肉餅專門店)

人均消費：HKD$38

今次講既係大坑既民聲冰室，大家不妨一上openrice，睇下民聲有乜食。我可以答你係鹹蛋蒸肉餅。仲有無其他呢？答案係接近無咁囉。但我點解都講，就係人講我又講。不過我係以平方面講。

鹹蛋蒸肉餅又叫做火山肉蛋，lunch 食就$38，份量係細DD。晚餐就係大d，座山高D，影相誇D，同貴D。講左咁多D，就係話你聽分別不太大。如果lunch 入到去就可以食少D，同平D。

鹹蛋蒸肉餅 $38

Dr. Panini (超價芝士火鍋)

人均消費：$75

講起芝士火鍋，對於平民黎講，一定係貴野，無$200都唔洗落樓，是晚，白色情人節，又唔想破大費又可以慶祝一番。當然係要做下功課，一Search 之下，呢間野又合晒Budget，又唔失禮。

講番間野先。鋪頭裝修方面就差d啦，因為要係街邊，一邊食塵一邊食飯。如果你想Candle Dinner 就幫唔到你手喇。間鋪得7個位，所以係一定要Book 檯。加上個2個Staff 應該日頭係有正職，放工後即夜晚就出黎搵外快，自己生意，Service 一流，有問必答例如選材，煮法，佢都一一對答，並無虛言。佢真係好有良心既餐廳。因為煮法一向都視為高度商業機密。

祺森冰室 (坪洲美食)

人均消費：HKD$30

坪洲暫時仲未好似長洲咁多人去，有時去坪洲都係去行下手1指山，兜個圈就算啦。但有時去食一個地方，唔多唔少都會幫襯一D地道野。問左D朋友，去坪洲有乜好食，佢就話蝦多士。聽佢咁講，我自己都上網search 過坪洲蝦多士，發覺好評同負評都有，咁應該鴿睇下老闆心情同埋D油炸得好唔好有關。但去到，見到門口個餐牌，寫住$30。一個Tea 做$30，仲要係坪洲。洗唔洗咁貴呀。

講下個蝦多士既用料包括：蝦肉、豬肉、多士及沙津醬，用料相當十足

先講蝦肉，佢用既都係D細蝦肉，即細細蝦仁，蝦味自自然然唔會太重，又唔係十分鮮啦

豬肉，既用途都休想整到件多士肥D。同足料D，令到更軟滑，其他作用唔大

多士：因為新鮮炸起，卜卜脆，熱兼燙口，油份仲未迫番出黎就上碟，所以頗熱氣。

綜合番以上既野，蝦肉細隻唔鮮；多士卜卜脆。一般啦。唔太差，不過收我$30又係貴左少少。

所以都係一句。咁應該鴿睇下老闆心情同埋D油炸得好唔好有關。所以睇你好唔好彩(laughing)

蝦多士 ($30)

蓮香樓 (舊式米芝蓮茶樓)

人均消費：HKD40

茶錢 $9/位

舊式點心，宜家大行其道，好多club house，宜家都加左D舊式點心落去，但我個人覺得舊式茶樓無咁容易取代到，就算野食未必跟得上潮流，但始終會有一班老客仔會去食

呢D舊式酒樓，宜家我地呢D後生既，都唔會成日去，所以去親都係為左潮聖又或者上Facebook 呃Like 用。蓮香樓話晒都係米芝蓮，佢都會用自己杯碟。但呢D茶杯唔係好多茶樓有，都幾特別。

金和記海鮮菜館 (炭爐邊爐)

人均消費：HKD$110

打邊爐，應該大家都唔會陌生，但用炭爐打，就唔係好多人 試過，今次我就約左d朋友一齊去打。

呢間金和d 檯椅都比較上係低左dd，因為佢個炭爐有番一定高度，所以校低d，方便食。炭爐同Gas 爐最大分別係炭爐會釋出炭味。d野食加左炭味就更野味

囂 (維港靚景酒吧)[已結業]

人均消費：HKD$60

2012年頭去過之後想再去先知執左。所以Delete 左再寫，呢間野個View 先係正。宜家THE ONE，18/F - 21/F左右個View 都係差唔多。大家可以一去。

間囂執其實我一早都預左，因為佢happy hour 真係好平，一杯野連加一都係$60，8:00pm 要埋單，咁既價錢，我又點會唔再去多一次，但奈何已經執左。你去ICC 都唔會咁平，ICC 仲要有minimum charge。

師妹甜品 (長洲甜品的選擇)

人均消費：HKD$27

香港想relax 下，入長洲食甜品，大家都會同你講食允升芒果糯米糍，但除左允升外，其實都有一間好正既甜品，師妹甜品仲要好有情調。但宜家愈來愈多香港人係星期六日入長洲，宜家想食，有時都要等下位。黎到呢間野，你預早少少入去，等到tea time 時就會好多人去，呢間野又唔係好多座位，所以要食都要就時間。

去得離島，有時都係想放慢生活既腳步，再加上食個甜品都係補充番平日生活既不足。呢間野既環境都幾唔錯，由碼頭沿海邊行，穿過小巷，再入到漆黑的小店，成個過程超正。

火焰雪山 ($29)

綠林甜品 (深水埗糖水老店)

人均消費：HKD$30

一個人的下午甜品，行完深水埗鴨寮街又熱熱地，咁就去左間比松記更多正評去食。呢間野叫綠林。聽朋友講，呢間野之前有好多人排隊食甜品，但近年好多甜品舖加入戰團後，綠林就無昔日咁多人去喇。

佢有兩款甜品都係出名，分別係豆腐布甸&芝麻糊豆腐花。芝麻糊豆腐花，佢個芝麻糊of course 磨到無乜粒粒啦，而豆腐花就差左DD，唔係太重豆腐味，俾D芝麻糊蓋過晒。(crying)

今次推介 ─ 豆腐布甸

佢個豆腐布甸，豆腐已經係D好滑既食物，好快就溶係口入面或者流入腸胃，加上佢用黎整布甸。令到件豆腐布甸有少少質感，唔洗即刻流入腸胃，佢停留係口腔入面。試多幾下，真係超滑。唔同芒果布甸，芒果有芒果肉，唔會咁易就流入腸胃。值得一試。(thumbs up)

豆腐布甸 ($16) ; 芝麻糊豆腐花 ($14)

釜山韓國餐廳 (貴夾唔飽韓國餐)[已結業]

人均消費：HKD$200

出街食打只有好評係唔得，有時食到唔好食野既野都要分享，提醒你唔好幫襯，一間唔好既野都有少少可取之處。呢間野一打開 Menu 都知貴野，不過有人請，咁就算啦，不過我只講呢餐平均$200/人，我之後去左老麥食左成個餐。可想而知呢餐飯，我食無咩野落過肚。如果你想屈人請食飯既，呢間都屈得過。

一開波坐低，椅都未坐定就黎9碟份量不少泡菜，有泡菜、2碟芽菜、薯仔、豆、椰菜、青瓜、茄子、同粉絲。可能我唔係韓國人，我真係食唔出有咩咁特別。如果你話一餐韓國菜，佢又offer 到咁多碟泡菜。只可以話佢有D正宗。不過 Quality 全部都係普通野。

食評

我個人鐘意簡而精。
不花無聊時間作出無聊批評。
好，會讚；難食，會寫。

出街食飯，平有平食，貴有貴食，有時唔係一定要用$200先可以食到$200既質素。我就係以Budget $200為限。

網上有好多人都有打BLOG，但真正分享到，又有難度。