2014年1月29日 星期三

王子廚房 (甜酸苦辣咖喱)

人均消費:HKD$42

今日係搵食日,周圍去食野,晏晝去完深水埗,今晚轉戰荃灣,一間超唔起眼既餐廳,一嚐特式咖喱,講到明特式咖喱,佢有巴基斯坦,有鴛鴦咖喱,仲有四色咖喱。聽個名就知夠Special。話晒自己一個,我可以去到好盡,食個四色咖喱。個Waiter 仲同我講,如果未食過,就食個鴛鴦。我平時咩都會試下,又點會齋食個鴛鴦咖喱。

佢有Set 同散叫 ,但又咁講,個Set 有紅湯,但個湯都幾咸,可以如果唔係一定要飲湯既,大可以散叫 。散叫仲要多好多選擇,佢有牛腩同豬扒。我覺咖喱配牛腩先係最Match。

四色咖喱吉列龍利柳飯 ($42)

劉森記麵家 (米芝蓮爽蝦雲吞麵)

人均消費:HKD$25

食雲吞麵又想好食既,細佬總結左有幾間都係幾好食池記, 沾仔記, 江仔記, 麥奀雲吞麵,但大部份都係旺區,今日我就去左深水埗,呢間劉森記都已經出左名好耐,不過我就無乜時間去試下佢,見今日就過年,又唔係好多人會仆去深水埗,所以就去試下。

一隻雲吞要好食,當然係包得好,雲吞皮要薄,同埋D餡夠靚,缺一不可。剛剛包好既就仲好,D料夠新鮮。呢間野咁好生意,根本成日要包雲吞,所以經常都會有剛剛包好既雲吞。

雲吞麵 ($25)

2014年1月27日 星期一

海安咖啡室 (外表幾十年不變)

人均消費:HKD$12

今日去呢間海安咖啡室都係因為連我老豆都知佢幾十年不變,所以我會一會佢,佢呢間野叫海安咖啡室,出名既野都係咖啡,但我個人唔係好飲咖啡,只好食其他野,佢出名既野原來係叉燒公仔麵,但sorry,佢又唔係成日有,佢可以好寸咁同你講,無wor。明天請早。呢D咪係霸氣。但你可以坐成個朝早,佢都唔會嘈你,唔係間間ok。

我今日去,某程度上係因為佢夠舊,呢間野位處信德碼頭對面,一間超大間咖啡室,佢大可以放租,又或者賣左佢,老闆佢食埋下半世都無問題。但佢繼續用番幾十年前既裝修,咁既堅持,抵幫襯。

2014年1月20日 星期一

美味餃子店 (特式菜脯)

人均消費:HKD$33

餃子,我相信大家無人未食過,祖傳係中國北方人食餃子,搞下搞下,日本人,韓國人都有餃子,其實就各具特式,有D可以做到皮薄,餡靚。我今日去番太子超出名既餃子店,佢出名既係個湯底,用上生魚野菜葛湯,個湯齋飲已經好清甜,唔洗食D餃子都已經好夠,如果你食晒D餃子再飲埋D湯,其實咁都夠一餐份量。

聽人講話佢既生魚野菜葛湯有少少藥用價值既材料去煲,有去濕、清熱、解毒之效,飲完個人仲要好滋潤。

呢間野設有最低消費,每位$20,唔好諗住兩個人食一碗,點計,你都要加多個野。所以要試迎野,最好唔好咁飽去。

韮菜餃拼雲耳餃 ($33) (10隻)

2014年1月18日 星期六

中大醫學大樓小食店 (多Cream 檸檬批)

人均消費:HKD$7

賞櫻花都唔係一定要去到日本先有得睇,香港中文大學其實都有得睇,一月至三月都係賞櫻既好時候,睇完櫻花故都係時候食D好野補番,又或者咁講,成間中大都好有好多花俾你賞,杜鵑,梅花,etc。中大話晒都係一間好大既學校,多Canteen 就一定,如果你睇完花,想即食既都可以去新亞個Canteen 食,但又咁講,好多人都會同你講,讀中大既都知檸檬批出名,出名多人排隊買,逢星期六日,下晝三點,準時開賣。

檸檬批其實唔係熱食,仲要係凍食,但點解係下晝三點先有得賣就唔知喇。呢件咁出名既Cake 其實只係檸檬忌廉整到冰狀,再加蛋糕同粟米片餅底。一件就係咁賣$7既檸檬批。

2014年1月9日 星期四

金鳳大餐廳 (舊式香味牛扒之家)

人均消費:HKD$77

香港食個扒,個扒同環境又要似番少少樣既餐廳,有時可以叫到成舊水一個扒。舊式扒房不失為一個好選擇,你可以咁諗,以今時今日既貴租,舊式扒房如果生意唔好,一早就執左,留得係度既,又有幾多會係差呢。

今日行過荔枝角道諗住食水餃,點知未行到水餃店,就發現呢間舊式扒房有勁多人排隊,咁我平時又食開野,就周圍睇下聞下,就知好野。一入間餐廳,扒既味就即時進入左個鼻。未食就已經知道佢點解咁多人排隊入座。

呢間野我眼見好多人等位,但我又唔係等左好耐,因為佢set 左要等齊人先可以入座,咁排係我前面既人,多數都係未齊人,所以就要再等過。所以大家如果想約朋友去,唔該等齊人,你先好行過去,否則又係要等多次。

今次推介 ─ 西次扒 ($77)

2014年1月8日 星期三

維亞軒餐廳 (平價石頭飯)

人均消費:HKD$36

純粹為平而食,呢期就過年,應該新年大把錢要洗,又要睇下戲,所以乜都要慳。上網搵左幾間尖沙咀野,都要成$60一個Dinner,為左慳得一蚊得一蚊既精神,轉戰佐敦,原本諗住食澳牛,但又好多人等位。唯有搵間遠少少市中心。維亞軒呢間野近QE,旺中帶靜,租又應該唔係好高,所以我諗佢要生存,平就真係一個不二法門。

呢間野其實佢好多款式都唔係貴,佢個下午茶都做到成7點,如果慳慳地,你都可以食個Tea,都係$30左右。

豬柳石頭飯 ($36)

2014年1月5日 星期日

合成小廚 (抵食熟食檔)

人均消費:HKD$49

熟食檔俾人既印象,係平同埋環境無咁好,但當你發覺周圍係咁加價既時候,要去搵更多更新既野食,咁先可以唔洗咁多錢,但又可以食好野。熟食檔既野食,有時候一D都唔差過正常餐廳。今日玩左一日,個肚最想既野就係好食既野,仲要快。如果唔怕環境無咁好,呢間都不失為一個好選擇。話晒都係佐敦旺位。

豉汁蒸鯇魚 ($45)

今次推介 ─ 豉汁蒸鯇魚