2014年11月29日 星期六

小紅館 (荃灣靚裝台灣野)

人均消費:HKD$52

水貨客攻港都已經唔係咩新聞,沙田,元朗,屯門,上水,荃灣即將變天已成事實,荃灣廣場附近多左好多新野食,等強國人去完商場鳩嗚後都有D野食。商場就已經係大牌子野,想食野就出去隔離睇下,呢間小紅館都係新開無耐,Openrice 都唔係好多食評,芢就最好一試,話晒都叫做新野,做好個頭好重要。

今日我食個Lunch 都用左$52,係荃灣計,呢個價食個Lunch 都叫做貴左DD,但佢Dinner 個價仲要貴一截,所以如果你想試佢既野,不妨集中試一味

今次推介 ─ 鹽酥雞球

2014年11月23日 星期日

康記粥店 (老店炸一腸風味)

人均消費:HKD$25

今日黎到大坑,已經係夜晚,好多餐廳都已經閂左門,得番唔多餐廳有得揀,再上openrice,一搵之下,仲有間老店,佢有佢既炸一腸,視覺上,炸一腸,炸二腸或炸兩都係一樣,但整法同口感都唔一樣。就要睇你鐘意點食喇。話晒腸粉大家都食過。講既只係focus 係有咩野出面唔多。就以下作出比較。

炸一腸 : 一條腸粉 + 一孖油炸鬼
炸二腸 : 兩條腸粉 + 兩孖油炸鬼
炸兩 : 兩條腸粉 + 一孖油炸鬼

今次推介 ─ 炸一腸

2014年11月11日 星期二

大師傅粥品 (一流腸粉)

人均消費:HKD$25

今日係光棍節又見完客無野做。諗住係觀塘有野食,市建局係觀塘附近大番身後,餐廳都唔多間。一上openrice ,搵左一陣,見到上排好想去嘅大師傅。佢出名腸粉,在於佢皮比較薄。呢間野係大角咀同觀塘都有分店,咁就係呢間。腸粉皮既厚薄,都係因為個師傅落米漿多與少,太多的時候豬腸粉皮會好厚好實,太薄既話,一夾就散晒。香港其實都有好多好食既腸粉,呢間會係我會番食既一間。

今次推介 ─ 叉燒腸 ($15)


2014年11月8日 星期六

茶家 (蘇豪區綠茶)

人均消費:HKD$48

上環半山係近期一堆偽文青搞出黎既地區,出產好多野食,例如咖啡coffee shop, bar, design and desert。 今日我去既茶家,之前睇報導話佢係由一個律師放棄高薪厚職出黎開既餐廳, 仲要搞間呢期好heat 既綠茶,我當然一試。

香港人好多都係一窩蜂去食, 所以在等位方面上都要等一些時間我今次都等左半個鐘, 但可能因為我太晏先去,所以好多野都買曬,我唯有食個綠茶芝士蛋糕。如果大家想食不妨早一d出發。

綠茶 Cheese Cake ($48)

2014年11月5日 星期三

深仔記 (又一間中下既雲吞麵)

人均消費:HKD$24

我之前其實係咁不停咁試左好多間雲吞麵店,歸納出雲吞好食之處在於,雲吞餡料、麵質同湯。雲吞餡料即係豬肉同蝦,以蝦計,隻蝦要係中蝦同埋唔可以梅,要夠新鮮;麵質比較上係爽口彈牙,如果用上竹昇麵就仲好;湯無咁容易出鹼水。價錢亦都唔可以太貴啦。

雲吞麵 ($24)

2014年11月2日 星期日

德美壽司 (超足料日式Full Lunch)

人均消費:HKD$79

日式便當or 餐盒,由前菜到甜品到餐飲,五道菜野,樣樣都做得好好食,又唔馬虎。一餐分別有薯蓉,溫泉蛋,薑,螺肉,魚旦,蘿蔔,雞蛋,炸豬扒,三文魚刺身,北寄貝刺身,蟹柳,白飯,豆腐甜品,同餐飲。有咁多樣野食,連加一都係$80有找。如果食晚市,呢個價都可以係話Mission Impossible。

我之前都有講過,話如果一間餐廳係好食,但你又唔想貴的話,食Lunch 啦,星期六日,早少少起身,做完個運動就去食,呢個未嘗唔係一個既可以慳錢,但又可以食到好野既方法。

今次推介 ─ 德美和食便當 ($79)