2015年10月25日 星期日

廣成魚蛋粉 (冬菇味既雲吞)

人均消費:HKD$21

香港人食雲吞其實都已經愈來愈奄尖,我自己都已經要周圍去搵先搵到好食既雲吞,今日就入到大埔廣福邨,呢間係好多單車發燒友都常去既餐廳,因為呢間野小食亭,可以泊單車既,食飯落腳順便休息然後再去大尾篤。冬天無冷氣都唔大問題,但夏天就唯有等佢開牛角扇。

講番野食先,佢既出名係魚蛋同雲吞,但我自己一個人無可能食晒兩款,只好叫左一碗淨雲吞,加上我之前都食過香港仔魚旦,彈牙程度我又覺得呢間唔及香港仔魚旦黎,再者,我聽同檯既伯伯咁講話唔夠彈牙,我即轉軚食雲吞。

2015年10月17日 星期六

生煎包點心專門店 (厚粉量足價平點心店)

人均消費:HKD$37

今日去到筲箕灣,諗住搵間好食既餐廳食啦,有一個方法係杜x風都agree,就係睇下佢多唔多人幫襯為指標,我見呢間生煎包專門店其實好多人去,諗住無死錯人啦,成班老一輩人士幫襯,都係貪佢大件夾抵食,所以就好多人去幫襯。

佢既價錢都唔係好貴,一籠點心都係講緊十元八塊,蝦餃都唔會加價,從價錢睇,佢都算平。另外,佢寫到明,樣樣都係即叫即蒸十分新鮮。作為後輩既我要求當然唔係單單係大件夾抵食,有時都會Compare 埋其他野。

當然食完就有唔同Comment,好似食開添x運後,對點心要求。

小籠包 ($16)

2015年10月16日 星期五

119 Plus (內有乾坤新式韓食)

人均消費:HKD$77

其實我今日去之前都以為呢間係新式小店,見Openrice 有半價Discount就去一試下,一個鐵錘天使麵連加一都係$77,見個鐵錘係新野就去試下,點知係連鎖到無朋友,超多分店果隻,咁呢個價就即時合理晒。就即係咁,呢間連鎖野呢新開張時,佢D野食份量都足,可能都係搏大家好評,但覺得好食先會話好食,呢間野我食完既Comment 係佢好夠味,夠味來自味精好重手,如果大家去食,可以叫佢少鹽。

鐵錘熔岩天使麵 ($64)

2015年10月11日 星期日

蒙麵車仔麵 (料正車仔麵)

人均消費:HKD$38

紅磡區既食肆,唔多唔少都係為左一眾理工大學同學服務,無他既。學校飯堂都係由大型連鎖店玩晒,午飯放Break 都係局食學校Canteen,佢又唔會點平俾你wor,係頹飯先叫做平少少。今時今日Poly學生想搵平野食,就近係紅磡。呢間叫蒙麵既車仔麵店,佢其實係一間小店幾受歡迎既車仔麵店尢其係佢既蕃茄湯,都幾濃湯。

呢間野有一個Selling Point 就係個男廚都幾靚仔,各位可以一去。

今次推介 ─ 蕃茄湯底

2015年10月3日 星期六

可可店 (平民價煎腸粉)

人均消費:HKD$30

煎腸粉或炒腸粉(下稱煎腸粉)係香港其實已經唔係咁容易搵到,事關工序多過一般腸粉,仲要存放期短,所以唔多地方有得食。煎腸粉之所以好食在於燒蕉部份腸粉,令到更加香口,手勢好既師傅當然係唔會炒燶,種種原因下,真係唔多地方有,有D茶樓都會做煎腸粉。

近年酒樓已經興起用點心紙,少左推車仔,煎腸粉呢樣野已經愈來愈少有,取而代之既係玻璃腸粉,來貨既腸粉都已經少左好多,不過都無計。但始終食法唔同,兩者無得直接比較,所以仲可以生存。

可可店最出名既就係煎腸粉加蛋,同埋佢既糖水,尢其夜晚,佢真係堅多客。仲有佢又平,一個飯款都係$30幾蚊,仲可以加$2有支裝可樂,下圖仲有Menu。

今次推介 ─ 煎腸粉 ($14)

2015年10月1日 星期四

哥登堡餐廳 (港式扒房)

人均消費:HKD$90

近日聽見一D舊式既港式扒房都相繼執笠,呢D舊式扒房已經買少見少,所以唯有快D去幫襯下。其實我自己都幫襯過其他舊式既港式扒房,好似飛鷹、美而廉、金鳳、波士頓同金雀。呢間哥登堡我就未食過,食完之後我都發覺D舊式既港式扒房係有一個共通點,就係大件夾抵食。

今次呢間就麵包+湯+一個頭盤再+一個主菜。

湯都係紅白湯;
頭盤裡可以揀田螺或串燒;
主菜扒方面你可以揀兩款扒類。
淨係個湯,麵包同頭盤都已經好飽,所以如果你係一個細食既人,個麵包真係可以拎走做第二日既早餐。

牛魚扒 ($90)