2013年12月31日 星期二

堂記腸粉專門店 (超正腸粉) [已結業]

人均消費:HKD$18

堂記腸粉講到明"寸",佢要夜晚六點先開,但你六點鐘去到,佢又可以話個爐未Heat 好,唔做生意住,叫你先等半個鐘,俾個爐Heat 左先wor。又有次,我去到,明明當日唔係佢既休息日,咁我又見佢無開門,問左隔離糖水舖姐姐,佢都話堂記腸粉係咁,成日唔開門,但佢又好多客,咁先吹脹。

話晒今日都係2013年最後一日,我就正準備去西九Count Down,但時間仲都有D,咁就去左食堂記,或者點點心。搏一搏,又俾我見佢有開,我就即時排隊,等左廿分鐘左右先有位,咁仲唔快D食完去Count Down。

今次推介 ─ 叉燒腸 ($18)

2013年12月29日 星期日

泰成菜館 (足料泰國菜)

人均消費:HKD$42

銅鑼灣想食下野,又唔想咁悶,一係渣甸坊,一係就登龍街,再唔係就謝菲道,但如果你食到都唔想食中餐既,登龍街其實都有好多野食,有刀削麵、日式拉麵、日式放題、泰國野同越南野。一條好短既街入面有咁多款式俾你揀,仲要好多間都係$50有找。

今日去左泰成,佢出名既就係大件,佢既蝦餅超大塊,好多人都會咁叫,我食Lunch 時間去到,都有成兩檯人叫左個細蝦餅,但奈何我自己叫左個炒粉絲,個胃再容唔落個蝦餅,所以可以提下大家,下次去,可以叫個蝦餅。

乾炒豬頸肉粉絲 ($42)

2013年12月28日 星期六

Pantry Bread & Pastries (創意 LEGO Cup Cakes)[已結業]

人均消費:HKD$48

去銅鑼灣想靜靜地High 個Tea,有D人會去食Cake,有D人會去酒店食,但今次我朋友帶我去左間Cake shop,件Cake 都幾Special,個樣好似Lego咁(見下圖)。近日都聽聞Inside out 一帶都畀大地主收番唔續租,果邊間ZOE又要被迫遷,如果想靜靜地食件Cake,百德新街可能係新選擇。呢間野正正開係銅鑼灣百德新街,旺中帶靜,唔算好多人,呢間野就半露天,但今日就天氣就凍左少少,食既時候都凍凍地。

2013年12月25日 星期三

月禾居 (新開有Heart 日本居食屋)

人均消費:HKD$36

旺角食野好多時都係食連鎖野foodcourt,一係就女人街兩旁,當你食到唔知想食咩既時候,可以去下黑布街附近,話晒HESHEAT同奶奶雞或者萬發都係好野食既地方,呢幾間都係黑布街一帶,宜家附近多左好多好野食。今日去到見到新開張,又係聖誕,食好少少都唔係好過份。

本住一試無妨既心態去食,仲諗住今晚食個聖誕大餐,所以lunch 都唔係點食得多野,叫左個叉燒拉麵同鯖魚定食,各有汽水送,仲要一D都唔貴,相比起港島動輒都$50,呢餐又野食又有野飲都係$30幾蚊,你仲想點。

今次推介 ─ 叉燒烏冬 ($34)

2013年12月23日 星期一

意樂餐廳 (多油的蕃茄餐)

人均消費:HKD$41

係沙田食野就愈來愈貴,事關大陸同胞大舉南下shopping,連帶新城市周邊既餐廳都貴晒,宜家想去沙田搵食,最近都要去到禾輋,但禾輋既食肆數量又唔係好多,想搵間抵食既都唔係易事,我之前去過禾輋一間茶餐廳,佢又唔貴,$30有找,但我又點會鍾情於中式野,今日食左間意式野,都幾好。

宜家香港,最出名既意式野,薩莉亞認左第二,無人敢認第一。連荃灣區最多好評既餐廳都係薩莉亞,所以可以大膽講句,意式野都可以好正。話分兩頭,今次食意樂,佢既味道比起薩莉亞更濃,份量更足。

龍蝦湯海鮮天使麵 ($40)

2013年12月21日 星期六

榮華冰室 (隱世冰室)

人均消費:HKD$15

上網成日打咩隱世餐廳,咩隱世,但事實上要搵隱世真係唔多,又要遠離市區,又要有少少舊,咁先可以叫隱世。今日去左茶果嶺搵食,搵食之前我都做左好多research ,咁先去,事關個地方都偏僻,唔係咁易去到。

茶果嶺呢個區,自地鐵將軍澳線起左之後,呢個區多數都只係村民先會經過。再加上入堆填區係將軍澳,經過茶果嶺既車多數都入將軍澳堆填區,呢個社區仲可以保留純樸既一面。

2013年12月19日 星期四

美味佳 (紅磡平靚正串燒)

人均消費:HKD$75

食串燒,有時就係你唔想去BBQ ,但又可以俾你食到燒野食既野。宜家係旺角街頭食一串都要成$11~$13,想食得多,當餐食就真係要周圍搵食。離旺角唔係好遠既紅磡都有3~4間串燒舖,但論野食同價錢黎計,美味佳絕對係好野。

呢間野好在近PolyU,所以一到夜晚就有好多學生去食宵夜,佢又可以做到街坊價,但野食又唔燒蕉,咁先好。呢間野都算就腳,都近火車站。

芝士丸 ($11/串) ; 芝士腸 ($6/串)

芝士腸,你係7仔食,佢又水煮都要呢個價。
芝士丸,你係葵芳廣場食,$8都係得兩粒,又係水煮啦。

2013年12月15日 星期日

睦美屋拉麵 (牛油拉麵)

人均消費:HKD$62

平日都成日去食拉麵,但今日行行下街,又心想食拉麵,平時已經行開荃灣廣場,都已經察覺到有間拉麵,星期六日仲要好多人排隊。今日心諗tea time 少D人,咁就試下佢啦。

事關香港呢一兩年係咁開拉麵店,但真係好食既都唔係好多,有D 就sell 豬骨、魚戒湯底,有D 就sell 叉燒,又有D就sell 幼麵身。今次呢間就sell 牛油湯底。如果你平時都有食開拉麵的話,你都可能會覺得個湯底都係一個幾重要既元素。

北之恩惠拉麵 ($62)

2013年12月11日 星期三

盛八食堂 (蛋之食店)

人均消費:HKD$98

講起蛋包飯,好多人一定食過,有泰式又有日式。泰式就個蛋皮出名薄,所以價錢就平D。日式既蛋就Rich D ,個蛋汁就未全熟,都幾好食,價錢相對就貴D,天后都有一間出名既日式蛋包飯,佢可以賣到$150左右。今次我食呢間,都叫做有兩間分店,唔係太多。水準都ok。

今次推介 ─ 吉烈豬扒蛋包飯 ($98)

2013年12月10日 星期二

拉麵台風 (服務一流撈麵三流)

人均消費:HKD$78

食拉麵食到入荃灣,但講真,宜家我愈來愈難搵到好食既拉麵,唔知係唔係食得太多好食既拉麵後,一有其他拉麵舖開,我都想去食下。今次食到入荃灣,因為都有朋友講造呢間野都幾唔錯,話晒都叫做多人排隊,我去食既時候都要等位。

先講下佢既Special,佢間舖既大細就真係好細,以荃灣租黎計,佢既開舖成本真係好平。就係因為細舖,客人要好似坐Bar檯咁,但佢既椅係好難拉,所以staff 會幫你拉椅,呢個係佢既Service,都好好Feel。話分兩頭,座黎計真係好唔舒服,吊晒腳。日本邊度會係咁?

如果個女仔係長頭髮,佢仲送埋橡筋俾你,呢d咁既service,真係好周到。

講野食,佢又好似新派拉麵咁,客人可以自己選揀你想要既麵既麵身、油、濃、辣。都可以話係幾細心。但一食落就知中招。

魚介豬骨湯拉麵 ($78)

2013年12月3日 星期二

美詩餐廳 (隱世台灣風味砂鍋焗豬扒飯)

人均消費:HKD$40

網上好多人成日都話咩隱世,但又要幾百蚊埋單既餐廳。我呢D窮人,成日周圍去,專搵平野食,有時仲會有意外收鑊,今次就係佐敦附近既美詩。我上左openrice 試圖搵下有無人之前去過,但佢既食評又唔係好多,我都係叫左個砂鍋焗豬扒飯同埋佢話晒係一間台式野,我朋友叫左個台灣牛肉飯。咁都應下景。

呢間野仲要好有台灣風格,唔食過都唔敢同人講佢係超正。個舖面都係一間唔特別既餐廳,唔周圍搵,真係未必知佢既野食正過好多出面野食。

今次推介 ─ 焗豬扒飯 ($40)

2013年12月2日 星期一

金泰皇泰國菜館 (宵夜泰國菜)

人均消費:HKD$54

今次原本去黃大仙食野,時間都已經係九點幾,但同幾個朋友都想食泰國菜,把心一橫,行落九龍城食,話晒都咁夜,有朋友就推介呢間,仲話呢間野平時開到凌晨二點,星期六日仲要有好多人排隊去食,聽到咁,就知係好野。

佢間野就係平民化左DD,(其實大部份九龍城泰國野都係咁),但佢又唔係好求其,一坐低就拎埋蝦片同茶黎serve你,service 都ok。

今次推介 ─ 馬拉盞通菜 ($46)

2013年11月16日 星期六

永豐餐廳小廚 (大角咀海鮮一絕)

人均消費:HKD$108

本人成日周圍去食野,有時都會懷疑係唔係間間都咁good,因為食得野太多既同時,有好多野要食多一至兩次先可以推介。今次我去左大角咀永豐,其實好耐之前都去過食lunch,不過今次就係去食宵夜。

佢既小炒+海鮮真係進步左好多,唔知佢係唔係加左好多蒜蓉或椒鹽,令到味道方面就幾野味。再加上佢既海鮮都係幾新鮮,佢sell 既野食再加上service,真係想唔俾個Like 佢都唔得。佢service 由你入間鋪開始一路都唔停,仇到咁上下時佢仲會問下你啱唔啱食,味道如何。咁既態度真係抵讚。

蒜蓉聖子皇 ($56)

2013年11月10日 星期日

瑞士咖啡室 (仿懷舊冰室)

人均消費:HKD$32

宜家呢期好多特式野都係港島區係中環想食平野,其實選擇唔多,加上又要搵D有特式既餐廳少之又少。瑞士咖啡室都算係連鎖式既仿懷舊冰室,佢既地板間間分店都係綠色格仔,清一式都係咁。佢既裝潢都仿懷舊,大家想去下就無妨。

食野就一般啦,但個價錢就唔係好一般。

2013年11月7日 星期四

十八座狗仔粉 (兒時街頭美食)

人均消費:HKD$25

細細個時周圍搵食都係好閒既事,隨住無左走鬼檔,宜家想食番當年既風味,有時真係要俾多D錢地產霸權洗。以前都係食下魷魚,腸粉,碗仔翅,幫襯D零食店,但宜家個人大左,想回味下就貴好多。

平時行過都覺得十八座都幾貴,話晒成廿蚊一碗野,同以前細個食既有好十差別。今日我個人又唔係好肚餓,同個朋友兩個人Share叫左個大狗仔粉同細火鴨翅,個份量都好飽,可想而知個料都足。十八座佢又用左我好Like 既公雞碗。食落都開心D

今次推介 ─ 火鴨翅($18)


2013年11月2日 星期六

泗益 (赤柱平民餐)

人均消費:HKD$33

講起赤柱,大家都會不期然諗到貴既西餐,但作為香港人,又唔一定去到赤柱就一定食西餐或者貴野,我呢D窮人成日都食平民餐,入到赤柱都會搵D平野食。唔好以為我為左食平野而食平野,你大可以上Openrice搵下赤柱有乜食,泗益就係赤柱既首位。

講下佢有幾吸引先,佢既野食係即叫即制,所以你要預留DD時間去等食,唔好等到最後一分鐘先入去。因為有可能要排隊,係食Lunch 既時間去幫襯的話就多數要排隊,仲要排左隊都唔一定有野食,佢D野食好快就賣晒,所以睇下你既彩數。係大時大節入赤柱既話,多數都食唔到,平日去食會好D。

今次推介 ─ 魚柳包 ($13)

2013年10月26日 星期六

源記甜品專家 (失色老糖水舖)

人均消費:HKD$26

同西環人講起正街糖水,3歲到80歲都會同你講源記啦。事關呢間野開左50年,好多名人都係坐上客,我回憶自己細個時都有去過呢間,我之前都覺得好食,唔知係唔係當年窮,無乜好野食,時至今時今日,我先有少少錢去周圍食。

如果齋睇個價$26蚊,我應該一早ban 左佢,但我以前都食過,仲要好好食,點都會想再食過。加上佢個碗上有個托,個托都係一個經典,因為佢有個銀器既托。所以我先會再去幫襯。

佢出名既係合桃露,想當年我食既時候,佢既合桃係有一粒粒,仲要唔烯。加上D老人家講話源記用石磨去磨D合桃,所以食出黎時仲會有一粒粒但已經好溶。

合桃露 ($26)

一休料理 (香滑熟三文魚)

人均消費:HKD$45

西環水街係一條超老既食街,事關附近有學校 ─ 香港大學,HKU 學生落水街食野已經唔係一朝一夕,又係一個學生Canteen。見今日行開西環,咁就聽佢地講去左呢間食Dinner,跟手就落正街食糖水。

呢間一休料理,個Waiter 就同我地講佢個香滑芝士三文魚飯都幾好,仲有汽水。呢期Special,咁就聽下佢講。叫左呢個佢口中既推介,食落又覺得ok。

今次推介 ─ 香滑芝士三文魚飯 ($45)

2013年10月24日 星期四

嗱喳街 (仿懷舊特色車仔麵甜品店)

人均消費:HKD$22

上網搵食時就係一個報紙分類廣告,唔睇細字仲以為係一份真報紙,但睇真d,佢係一間餐廳既餐紙,就係呢張圖,吸引我左呢間餐廳。呢間野叫嗱喳街,聽見嗱喳呢兩個字就知佢係食嗱喳麵。再加上個圖上有咁多嗱喳麵既terms,仲唔係食嗱喳麵咩。

一間為位舊區長沙灣順寜道,條街平常人係好少行入去,除左你約左人打邊爐食雞煲,呢條可以話係食街。其他野就無喇。好明顯今次我係專登去食。

2013年10月20日 星期日

嘉樂冰廳 (街市大大奄列)

人均消費:HKD$30

我上星期都係荃灣,食左蘭香,食唔到嘉樂,所以今日就再黎荃灣,食番以蛋出名既嘉樂。佢出名既係火腿奄列,所以本住肥死就算既心態去幫襯。呢間野出名既奄列係用7隻雞蛋黎整,齋計7隻蛋既卡路里已經有644卡路里,一個常人,每日都係攝取1,800~2,000卡路里。如果齋食晒d蛋未計火腿同汁&飲品,已經係一日既35%。所以係本肥黎食。佢另外出名既有奶昔,我都試埋。

奶昔去老麥都成日飲,黎黎去去都係三隻味,呢間奶昔仲有其他幾隻味好似鮮蛋奶昔、阿華田奶昔、好立克奶昔、雪糕奶昔,不過都係同老麥差唔多。叫就叫多幾款你揀,不過收到成$25一杯就真係貴左少少。不過佢都係即叫即整,因為上檯時個杯入面都有冰碎,可想而知佢個奶昔真係fresh。

阿華田奶昔 ($25)

2013年10月16日 星期三

Ringer Hut 稜閣屋 (長崎素麵但唔啱香港人)

人均消費:HKD$47

呢期睇報紙雜誌,Ringer Hut 呢個名出現超過數十次,我又成日周圍搵野食,又點會唔試下新野,未去之前我都做左少少Research,呢間Ringer Hut 係日本有成500間分店,d麵又係日本第一,第三同第十。嘩,好似好堅咁啦,佢今個月12日開張,咁我專登搵晚閒日去食。

食完即時覺得只有Keep Fit 中人先會Like,事關佢係成碗菜加麵。肉都只有細蝦3隻。佢收緊我成$59一碗。食菜,我自己整都得啦。我個人意見,如果你唔係素食主義者,真係可以慳番幾十蚊。食其他拉麵好過。香港人好多都係無食不歡,呢間日本拉麵咁多菜,我唔知佢可以生存幾耐。

Champon ($59)

先講下佢碗Champon,講名氣,佢原來係日本朝日電視台既日本第一。係咪好吸引呢?全日本第一wor,點都會唔錯。

按下一頁既實物圖。

2013年10月14日 星期一

添記法式三文治 (唔熱但超脆平民法包)

人均消費:HKD$29

香港想食法包既地方,唔係少,有時候睇下收你幾多錢。係唔同地方,收你既錢可以分別好大。係佐敦有一間好出名既法包,聽聞老細係越南人,越南係好耐之前曾經係法國殖民地,當時有唔少法國人,而呢個法包就隨住呢個Uncle 傳左入黎香港。

佢個包即叫即做,包熱包脆係佢既Selling Point,個包用佢既獨門餡料黎整,層次惑超Good。

蘭香茶餐廳 (荃灣街市豬扒)

人均消費:HKD$40

去到荃灣,大家可以不妨睇下佢地食野既價錢,Lunch 同 Dinner 有時都係差不多所以食Lunch 就唔好去d普通餐廳。揀d出名既舖頭去,但佢地好多時都淨係開上晝至下晝,而夜晚就可以收檔,因為d野都賣晒。你大可以上「開飯」睇下荃灣區,佢地最多好評既餐廳都係連鎖野。要想呢區搵食就真係要睇人龍。楊屋道街市入面有兩間成日大排長龍既餐廳,一間係蘭香,另一間係嘉樂。

蘭香以豬扒出名,嘉樂就蛋出名,兩間星期六日都會有好多人排隊,加上兩間餐廳都好近,所以兩間餐廳加埋一齊既人龍都唔短。蘭香清queue時間相對較快,話晒舖頭都大間D,伙計手腳都快D。所以蘭香抵排D。

豬扒炒米 ($37)

蘭香以豬扒出名,佢既豬扒味道有少少特別,加左DD南乳同咸味,可能佢加左鹽。食落塊豬扒有少少似豬手,但塊豬扒既肉又唔係好似豬手咁「鞋」,既腍亦咸。如果你Like咸豬手就要黎蘭香。但我個人就唔係好Like,所以我都係唔係咁恰當去俾Comment。但只可以講句既係佢既豬扒係同豬手Crossover。

2013年10月9日 星期三

家樂快餐食堂 (工廈食堂)

人均消費:HKD$19

市建局係觀塘區既重建項目已經收左好多好好食既食肆,新南苑就係其中我最Like 既一間。觀塘區宜家所淨既就係APM 對出一堆廠廈,食肆位於地廠已經少至又少,話晒d租又貴多一截,所以去廠廈食都係有人帶路或介紹,好似新境界餐廳都係要上一層。

同埋廠廈食肆都係一日做一兩轉。夜晚生意又唔多得,所以好多都係做到夜晚七點就收工,如果唔係呢區返工又想試下廠廈既野食就要睇時間。

觀塘區廠廈食肆一般都好平,啱晒我呢d窮人去食,一個飯都係$30有找,係宜家既境況,想用$30搞掂一餐都真係唔容易。俾你食豪d都係$35有個扒餐。

2013年10月7日 星期一

景霖正宗四川麻辣米線 (大雜會海鮮米線)

人均消費:HKD$46

我自認平時係鐘意食譚仔既人,就係鐘意食佢個套餐,$43~$47都有試過,食黎食去都係丸類同肉類。佢既可取之處在於辣,但食得多時都會厭。我自己都會去發掘新既地方,以防自己食到好厭。譚仔係分店多,梗有一間係左近,但如果去到佐敦,咁就可以試下新口味。

海鮮過橋套餐 ($46)

2013年10月5日 星期六

德興隆 (荳品老字號)

人均消費:HKD$7

近排唔知抽起乜筋,勁想搵D老字號去食野,上網搵左一排,公和就算啦,已經食左好多次,今次就去到北角既荳品老字號,呢間野又唔係好難搵到,一出地鐵站行5分鐘就到。呢間野置身於街市中間旁邊,街市中間係一列排檔,賣既都係d家庭用品。呢間野同街市都相配合。一個老街市配上老名。

行入舖頭甫見伙計係度轉動著一盤熱哄哄既煎餃或煎包,蒸氣向上。牆上擺放住好多樽腐乳。十分濃郁老店既氣味。呢d荳品老店,多數賣包餃及豆花。好多客人都叫熱豆腐花。聽見我都好想一試,但天氣又唔係好熱,所以我都係叫別的東西。

據說呢間野將於本年十二月因舊樓重建而結業,如果想一試佢既食物就要盡快去。

勝香園 (脆脆包一絕)

人均消費:HKD$38

中環想食平野,去排檔就係一個好選擇一個係士丹利街,另一個就係半山鴨巴甸街一帶(有兩個),中環返工既Lunch 可以$30就埋到單,d野食仲要唔係hea。同d 中環人講起「蕃茄麵」,佢地第一時間就講「勝香園」三個字。但奈何佢既營業時間係星期一至六,由0800-1730,如果唔係中環返工既你,想食到就真係淨係得星期六先食到。

佢「蕃茄麵」出名在於用鮮蕃茄黎整,佢仲會俾埋成個蕃茄你,但只係收你廿幾蚊,想唔多人食就難。足料兼平,一眾中環人又點會唔幫襯。我食完覺得佢個「脆脆」仲好食過個「蕃茄麵」。

今次推介 ─ 檸蜜脆脆 ($11)

我已經好少用推介呢個Term,話晒用得太多會好濫。但佢既檸蜜脆脆真係好食過翠x,翠x成日話自己既奶油豬好食,但始終唔係老細整,又唔係即時上碟,點都唔及勝香園。呢間野既脆脆佢即上檯,上檯時仲熱辣辣又脆卜卜,加左其他味道,好似呢間最出名既檸蜜脆脆就係加左檸蜜,有檸味,更開胃。呢度仲有其他選擇,唔洗齋食奶油。如果你食過呢間既脆脆,有好大可能唔想再食翠x既奶油豬。所以諗清楚先好黎呢間野。

2013年10月4日 星期五

炊豕店 (懷舊豬飯小店)

人均消費:HKD$43

懷舊小店都幾值得人回味,但宜家香港既租金真係好貴,好多老店都做唔住,佢D野食加到太貴,去都唔係咁想。新開既食肆有D會以復古為前提。禮頓道聖保祿學校隔離開左間叫「炊豕店」既餐廳。睇中文字,我都唔識讀呢間野既名。「炊」讀音「吹」解作燒飯;「豕」讀音「始」解作家豬。真係自中七中國語文及文化科後都無再讀過,今日食餐飯,反而上左一堂。

呢間野沿用公雞碗上佢既秘製豬扒飯,宜家用公雞碗既食肆真係唔多,話雖而家都有商家重出公雞碗,但都叫做有Heart。

2013年10月2日 星期三

澳洲牛奶公司 (浪費美食餐廳)

人均消費:HKD$33

之前睇報紙先知台灣人黎到香港好鐘意去澳洲牛奶公司(下稱澳牛),我都發覺自己已經好一排無去過澳牛,以我記憶,上次去食由坐低到走人都係15分鐘內既事,今次吸取左上次既教訓,識得點樣慢D食。(但伙計既上菜及落單既速度不變,都係咁快)

去親都係食常餐,佢常餐都係包+蛋+火腿+麵+熱飲。佢既好食既都係個蛋同麵。

澳牛,個餐廳名都話左你聽,佢地係用牛奶黎整野。佢既炒蛋方面,就係加左牛奶去炒。而其他出名野好似燉奶,我就今次就無食到。

2013年9月29日 星期日

牛一 (抵食Hotpot)

人均消費:HKD$68

一個窮人想打邊爐,想平,就一定係Lunch 時候打。一般$70都可以有得落樓。好多人都講既有牛陣、牛涮鍋、Hitpot,呢幾間勝在多分店,總有一間係附近,但今次我就行開尖沙咀又好耐無行入樂道,唔知間曼聯吧變成左乜野,就見佢變左間打邊爐店,見個價又唔係貴,咁就入左去。入去之前佢叫問定你叫乜野Set,絕對唔會拖你時間。

2013年9月27日 星期五

興隆泰國美食 (泰式炒飯一絕)

人均消費:HKD$45

食日周圍食,有時食到某d菜式都厭厭地,就好似泰國野咁,食黎食去就好似差唔多,高下立見都係師傅既功夫。每次想食泰國野,自己好不自覺地會去九龍城,因為佢有好多選擇,有時唔知邊間好邊間差時,排隊人數多寡都間接話你知間野有幾吸引。

今次我就求其入左間泰國美食,自己一個人去,當然醫肚為主,我只係叫左個菠蘿炒飯,佢炒出黎個樣成個碗咁,我自己都將個碗倒轉放,又剛剛好。

今次點解連菠蘿炒飯都講一餐,兩個字講晒「唔油」。出面食既菠蘿炒飯80%以上食完個碟都或多或少都會有油,但呢間興隆就無油,我真係想問下佢點炒。但佢又唔係撈飯咁整。不過如果想健康d食,呢間都係一個唔錯既選擇。

菠蘿炒飯 ($45)

2013年9月24日 星期二

食記餐店 (回味兒時美食)

人均消費:HKD$29

以前地鐵興建南港島線時又話過鴨脷洲大街有好既小食。見今日抽起條肋就入左去虐呢間野,鴨脷洲大街位置就偏僻左少少,平時要去真係要搵路先去到。但小食呢家野我話like 時可能你唔like,今次寫呢篇野我只係回味細細個時去士多既野食。

生菜魚肉翅 ($14)

2013年9月23日 星期一

天使麵 (灣仔意式小店)

人均消費:HKD$39

灣仔區好明顯係商業區,想搵個可以relax既環境食個tea,休息下,其實竟然有選擇。我都SEARCH左一排,呢間叫"天使麵"既餐廳,佢環境個Feel 都幾正,一踏入呢間餐廳好似由繁榮既灣仔穿梭到恬靜既歐洲小店。事關灣仔食tea 既人真係唔多,呢間餐廳係tea 既時段又唔係好多客。你自己一個人去就最正。

呢間野好Special,自己搵位,自己買飛,自己食。Service 可以話無啦,所以唔洗點expect 有人serve 你。我就叫左個鴨胸天使意粉+玫瑰花茶。喧就係一個Tea,我由5點坐到7點,拎住本雜誌,一頁一頁咁睇晒。一個好relax 既下晝就咁就過左。

鮮茄茸煙鴨胸天使意粉 ($35)

佢個鮮茄茸煙鴨胸天使意粉既Size 一d都口細,佢size 拍得住一個正餐。一個男仔既正餐份量,如果你5點幾6點食直頭可以當係晚餐,可以唔洗點再食Dinner 都可以。

鴨胸,佢都有成6舊,仲要唔細舊,超肥美,絕對超值。

2013年9月20日 星期五

安利魚蛋粉麵 (香港新一代魚蛋粉)

人均消費:HKD$30

自香港仔謝記執左笠之後,想食好既魚旦就真係又少左個地方,筲箕灣都有一間好食既餐廳,佢位處筲箕灣東大街,齋聽東大街三個字就知有好多野食。但一條街入面都有兩間安利。一間係安利魚蛋粉麵,另一間係安利大排檔。兩間都係開業多年,相對地安利魚蛋粉麵會岩香港人鐘意食魚旦既口味。

講開魚旦,點先好食,魚肉要有咬口,爽口彈牙,呢4個字都應該成日聽到,但又有幾多間可以做得到呢。香港仔謝記既魚片魚旦都做得到。我推介得既,安利都OK。

安利魚蛋粉麵有三樣好野,一係魚片;二係牛腩;三係炸魚皮。我今次去到,只係有幸食到其中兩款。食一個切腩魚片撈粗,入面有5樣野,切腩、魚片、撈粗麵、菜同上湯。魚片同牛腩都係呢間野出名既野,最抵食。

今次推介 ─ 切腩魚片撈粗 ($36)

2013年9月15日 星期日

韓雅林 (超正牛仔骨)

人均消費:HKD$79

窮人想食平野,一定要周圍search下,咁先可以食得到平野。有D食肆都好好,午餐Menu同晚餐Menu收費係唔同,有機會差好遠。落到銅鑼灣想食好野,有時就真係要用D錢,為左唔好用咁多錢又可以食到好野,午餐就食豪D。加上星期六日有時唔想留係屋企,行下街食個飯就又一日,午餐搵間好食既,當係獎勵下自己一星期既辛勤工作。

韓雅林呢個名,你可能未聽過,但你不妨上多幾個BLOG,睇下人地有幾多好評,就知佢出名係牛,同埋貴,一個晚餐可以收你$200~$300。但佢收得你$200~$300點都會俾番D好野你食。我都Search 過,佢個午餐係$100有找,價錢同晚市差一大截。

2013年9月10日 星期二

忠記粥品 (包脆炸倆)

人均消費:HKD$16

香港人如果有人話你聽佢未食過粥,佢肯定講大話,大家對粥店既要求一定唔會太高,但求足料,唔太咸。連一D咁普通既食店,我都推介〝銖明顯係正野。我遇上一間超正既粥店,呢間座落灣仔集成中心對面,街上行人及巴士不絕,但停步留意一間粥店既人亦不少。已經係晚上8點,大家都拖住疲倦既身軀回家。我就係周圍搵新野食,見間野食客人數不少,入去一試。

今次推介 ─ 炸倆 ($8)

2013年9月9日 星期一

BB 拉麵 (粗幼雙絕拉麵)

人均消費:HKD$78

大坑係一個好多好野食既地方就唔洗多講,想食好野,入黎大坑走一轉,你可能搵到更多好食既一餐,出名又好食既拉麵都有幾間。拉麵來就俾小儀佢地推介過之後已經無之前咁好食。今次去食左間好食拉麵叫BB拉麵,其實佢都未有招牌,但位於京街。店舖內的裝修都係全新。食個拉麵都唔係好貴,$90有找。豚王拉麵既前師傅兼大里先生就係呢度自己開舖。質素媲美豚王。

呢間個特色係佢有粗麵同幼麵兩款你揀。我同朋友每人一碗互Share,所以食晒兩種口味,從而得知佢豬軟骨同叉燒都好好食。

豬軟骨豚骨湯粗拉麵 ($78)

2013年9月4日 星期三

佐敦咖哩屋 (細食人士之咖喱屋)

人均消費:HKD$64

成日聽人講話食咖喱就要去重慶大廈或旺角咖喱。但我死都唔信大路人所講。係都要搵間有特色小店,上openrice search 過一間開業多年既咖喱屋,諗住無死錯人,點知都係中招。今次同左個朋友去試呢間係佐敦吳松街叫佐敦咖哩屋,入面都係印度人打理,睇落好似好有風味,咁我就一試。

佢一黎就係咁Hard Sell 佢個Promotion Menu,有好多平野咁,仲要唔加一。講到好有良心咁,但我呢D窮人,佢個二人餐要成$160,我又覺得貴左少少,咁叫佢俾個正常Menu黎睇,你唔問佢都唔拎個單人餐Menu 出黎。唔睇尢自可,一睇就把幾火。一個單人餐都係$62。咁我就Compare下佢有乜Special ,原來只係多左個小食。哈。我即時叫兩個餐就算。

佢就上左個薄脆

2013年8月24日 星期六

I Café (出色炒一丁)

人均消費:HKD$34

呢間餐廳都係朋友求其帶我去食Tea 時發現的。我食前都只係覺得呢間係好普通既餐廳,不值一提之際,食落先知好食。但由於都係Tea Set,我只係試左個炒一丁,覺得正先Post食評。所以得一張相,希望大家見諒。

講番最具香港特色既炒粉麵,炒河炒同炒一丁都係好睇師傅手勢。炒河,河炒本身係製造過程已經加入大量油,炒出黎智唔會癡埋一大舊河粉都可以睇到師傅既手勢。炒一丁,都係一樣,一丁係一種吸水既都身,先耍整熟個麵,麵身唔應該太林,而炒方面又要睇下你落得多唔多油。呢D都係好食既炒一丁。

今次推介 ─ 雜錦炒一丁

我食落就知個師傅既手勢勁,話晒佢D麵身唔太林,食落又唔油,豉油色澤平均,淨係個麵身已經值錢。唔洗點講個D腸,紅蘿蔔,肉片。佢有齊炒一丁既好處,講真超好食。我一定會再去。話晒半島中心真係好就腳,去邊都方便。

雜錦炒一丁 ($34)

2013年8月19日 星期一

三英甜品 (精明之選)

人均消費:HKD$5

周圍搵平野食就係我經常做既野,今次搵到間係油麻地食甜品既舖頭,佢宜家逢星期一都係有一款糖水係賣$5,今次就係做緊紅豆沙。話雖平時都係$10有找,但如果可以用$5就食到。咁咪試下。

佢話$5,但都好足料,唔會無糖,紅豆味都好濃,又唔係一味死落糖溝水,佢$5真係值$5。仲石以有冷熱兩款揀。中式糖水當然係熱食先好食,滑d。

紅豆沙 ($5)

2013年8月18日 星期日

新香園 (24小時蛋牛治)

人均消費:HKD$47

深水埗區其實都有好多好野食,又平又正。有D款式你係尖沙咀旺角係食唔到。深水埗區貴為全香港最貧窮既區域,我呢D貧窮人士又點會唔係成日黎搵食。如果你都認同我所講既,你不妨坐車落黎食,食完再坐車落番去行街,都仲平過你係尖沙咀旺角食。

今次就去左新香園,佢係24小時營業,你唔洗就住時間黎,幾點都OK,佢都有幾樣野出名,分別係蛋牛治,豬手麵&凍檸茶。我都有叫到蛋牛治&凍檸茶。但我都係影左蛋牛治張相,因為杯凍檸茶其貌不揚,影都無謂,打字最實際。

今次推介 ─ 蛋牛治烘底

呢件蛋牛治,分別有蛋,牛,冶三樣組成。蛋同牛,佢係將兩樣野Mix 埋佢,非一般既滑蛋配上非一般既滑牛,正。份量都唔少,都夠半份晚餐。食第一啖時就知道係正野,望落個份量就知可以叫多D份先夠飽。點都要講下塊烘底令到塊多士即時好脆身,正。

蛋牛治烘底 ($17)

2013年8月17日 星期六

華星冰室 (名人冰室)

人均消費:HKD$34

華星冰室可能你聽左好耐,分店都有三間,仲要係明星開既。講到咁我都仲要推介,好明顯真係好食。其實呢間野我都唔係第一次去,今次食佢既蛋,真都仲係好滑如果你係鐘意食茶記既炒蛋,呢間都係一個幾唔錯既地方。呢間野好在一早講左佢既蛋係用日本北海道3.6牛乳整,3.6牛乳飲既時候你都覺得好滑,佢用係炒蛋方面簡直係靈丹。

再講下佢既牛肉,佢既牛肉真係好腍,但就係唔係好香牛肉味,可能落左d唔知乜野「拿」一「拿」佢,咁我都有少少失望。定係我少食清真牛肉呢,咁就唔知喇。

今次推介 ─  常餐

常餐 - 牛肉通 + 火腿炒蛋 ($34)

2013年8月14日 星期三

茶記 (叫茶記既茶記)

人均消費:HKD$68

有時想食平野,真係要去晒香港九龍新界,今次都係去到荃灣啦。話晒都有好多好地方行。但食野就要下功課先喇。我之前都去過中染食過平野,今次都係再去,上次都諗住食呢間今次就食到。呢間叫茶記既茶記,佢除左有扒鋸都有小菜叫,但我Search 過佢既Comment 都唔係太好,所以我都係食$68個扒。其實佢d餐具都幾Special,刀唔似刀,切野時都有少少難度,不過因為d肉都好嫩,所以唔洗好大力切。

佢呢間野真係有少少似茶記咁,唔收加一,明碼實價。食$68就收你$68,咁已經加少左成$6~$7。呢個都係好處,唔洗被呃左都無得出聲。

講下個牛肋骨扒,牛肋骨一d都唔細塊,成塊鐵板咁大塊,好正。啱晒我呢d大食人士。d肉其實都幾嫩口,唔洗好大力就可以切到。呢個先正。但佢都有唔好既地方就係牛肋骨即係有骨,就唔係啖啖肉咁。如果以$68都算抵啦。下次都可以再去。

牛肋骨扒 ($68)

2013年8月10日 星期六

香港雞皇 (雞香四溢)

人均消費:HKD$38

今次入西貢,都係為左搵食,就係食左滿記,但宜家咁連鎖,所以我唔會寫Comment。之後就轉場,原先Plan 定去食旺泰特食,但太多人,所以迫住要去第二間,係諗唔到食乜之際,一陣好濃郁雞香傳入我鼻,我二話不說就入左去點左個招牌飯食。

個咸香雞飯,佢既整法係將隻雞浸左落d咸鹽度,浸幾耐就唔知喇。佢同一般鹽焗雞咁,有咸味;佢有海南雞既滑度又有沙薑雞既味道。呢個Mix and Match 就真係難得。佢有浸鹽但雞肉又唔係咁鞋,所以話食咸雞又多左個選擇。

薑茸,佢既薑茸味好似D雞,即係話如果你想D雞咸D就點下啦。

招牌咸香雞飯 ($38)

日和號 (足球小將主題壽司)

人均消費:HKD$48

限定日期:8月10月

足球小將都係一群80後細個時追看既漫畫,戴志偉永遠都係神級人物。所以今次聽到有間餐廳夠薑做足球小將既主題餐廳。我又點會唔去呢,話晒MegaBox都唔係好遠,去到,日和號成間野都好似為左足球小將而設,D布置都做到好足,有特式Menu列車,車箱,餐紙,餐巾,紙牌公仔乜都有。未食已經開心死左,好入左去就有如罝身足球小將歷史館。

平時成日行街都會經過,佢Sell壽司,仲有宵夜Discount,但都唔會入去,如果唔係今次去左,我都唔知幾時會去。因為佢宵夜做買一送一,平時就無咁平。我呢D窮人都會睇時機先去幫襯佢。

呢餐好明顯係俾部相機食飯多過俾人食飯,見到佢有個足球小將Menu,但一D都唔吸引。我只好睇番正常Menu,一個Lunch Set $58(包一個主菜+個手卷同杯野)貴就真係唔算貴,話晒都俾左咁多野食出黎,呢個份量都夠1.25個人份量(big hug)。手卷隻炸軟殼蟹係凍既,佢既野食係超一般,你以和亭Quality。

軟殼蟹手卷

2013年8月9日 星期五

The Flying Pan (24小時營業蛋店)

人均消費:HKD$95

The Flying Pan 其實中環同灣仔都有,今次食完全係因為飲完酒轉場,想搵d野食,咁arm 上forum search 過,呢間The Flying Pan 係出名食蛋仲要係24小時營業,適合夜鬼。我地話晒都想搵個地方吹水同食野。眼見都有好多食Post 話班尼迪蛋好食,但我呢d乜都會試一餐既人,都係食個Omelette,試下同Comment 下。

我一行三人去食,我朋友都叫左班尼迪蛋,但我就叫左個牛柳奄列+牛角包+豆+蕃茄湯。呢度個奄列都唔係好蛋Feel,可能外國人對蛋既要求唔同啦,佢地既蛋入面都加左d芝士,令你食完個All Day Breakfast都唔會好肚餓,話晒d芝士都好膩,所以飽就一定夠,但我就覺得個蛋都唔及日本人整蛋方面,不過之一個Breakfast黎計都ok。個蕃茄湯先係好野,你係香港飲既蕃茄湯一般都好hea,但呢個蕃茄湯好足料,蕃茄係用原個蕃茄打碎再煲,好多雜質,好有口感,下次不妨一叫個蕃茄湯。

Philly Omelette ($86)

Trafalgar (可食煙酒吧)

 人均消費:HKD$60

一間酒吧有乜好寫,其實間間酒吧都係咁,但我又點解寫。我相信大家唔洗我講都知室內禁煙,尢其落得酒吧,多數都會扯番支煙。呢間吧有戶外部份咁arm fit 到室內禁煙條例下既50%外露。所以都有唔少灣仔上班一族上去飲野。佢落雨都唔怕,因為都有伸縮帳篷,日曬雨淋都可以繼續。呢個係我都buy佢既。

有時酒吧係叩都叫一兩杯野就算啦,呢度Happy Hour 都係$60連加一,咁都ok,你同朋友去Cafe 吹水有時都要呢個價。佢仲耍送埋花生,但佢既花生唔同Inn Side Out 既,呢間唔洗剝殼,可以即食。所以都唔ok。

有時窮都要用錢,用唔太貴既價錢可以enjoy 到正野,咁就係我呢d窮人要周圍Search野既Result。

花生 (Free)

2013年8月8日 星期四

三洋餐廳 (濃鮮魚湯)

人均消費:HKD$36

湯飯其實大家都唔會點陌生,好多餐廳都有供應,但會唔會係佢既Special就另作別論。今次去既係三洋餐廳,呢間橫睇掂睇都係一間好普通既茶記,但佢既有Heart 之作,咁就令我幫襯佢。原因在佢既湯飯皇食完有乜好。有維他命ABCD,又乜蛋白質,維生素B,仲可以防止高血壓。睇完想唔幫襯都唔得。

我專登影埋張相出黎,費事話我鳩嗡。所以我都叫左個鮮牛肉+鮑片+莧菜(湯飯),佢既肉都尚算腍,佢既莧菜份量真係好多,如果以$36既Standard,佢又真係好夠。加上佢個飯係另上,佢俾d飯都係d硬身少少既飯,等你自己浸湯定齋食。好窩心。(tongue)

佢個湯先正,really用魚湯,油都唔係好多,我原本唔諗住落晒d飯落湯度,但佢既鮮味吸引到我將飯慢慢落湯。我食完個飯之後,我飲晒成碗涉,因為好似屋企煲既生魚湯。咁先好。(thumbs up)

2013年8月4日 星期日

丸亀製麵 (靜過自修室)

人均消費:HKD$27

成日講野食,有時都係要從多角度寫野。宜家作為打工仔,三餐都有問題時,都要讀書進修。成日Pacific Coffee,Starsbuck,Caffe Habitu都好多人係度溫習,買杯野,坐一日。今次我去左iSQUARE既丸亀製麵,佢Sell讚岐烏冬,前排仲好多人,不過重點係宜家無咩客人,好多人見到都唔入去。去呢度好過去Cafe,分分鐘靜過自修室。

成個尖沙咀,你以為俾強國人佔領左,佢地佔領既咪又係許留山,老麥,星巴克;香港人又怕左強國人,所以都唔係好想出尖沙咀。但iSQUARE尚未被佔領,有間丸亀製麵,佢又唔係好多客,少細路,又自成一角,唔會有人嘈,絕對係溫習好地方。我今次消費都係$27,叫左麵烏冬,坐左成個下晝,咁仲唔夠皮咩。

仲有,佢有提供免費清水任飲,有熱同唔凍,要hea一個下晝絕對係唔錯既選擇。

2013年8月3日 星期六

富山麵家 (Bathing Ape主題拉麵)

人均消費:HKD$95

限定日期:8月3日至18日

呢期D人仲係咁講話食一蘭,細佬已經係開張一周內光顧,發覺先食先開心,今次都唔例外,見到有人Post 左出黎富山麵家同Bathing Cross Over 搞拉麵,我見今日係第一日,我又點會唔食啦。話晒Bathing Ape 咁多年都咁受人歡迎,而IT都收歸旗下。可見Bathing Ape既吸引力。今次呢個Cross Over係期間限定兩星期,過左就難有Special Bathing Ape 既Display。

今次食既富山成間野都好似為左Bathing Ape 而設,牆、餐具、紫菜皆為Bathing Ape,好入左去就有如罝身Bathing Ape 專門店。環境:(thumbs up)

內容,富山拉麵東京拉麵祭最強銷量拉麵勇奪第一位,我當然會試下。咁我自己一定會比較下佢同正宗日本拉麵既分別。正宗日本拉麵既特色係比較油膩,麵身較粗,一隻溫泉蛋開邊。睇番下圖,條拉麵都幾粗身,加上個湯都有油油地,食落就更滑,佢麵身比較硬身,有咬口。講埋舊叉燒,肥瘦好均勻,Good。(kiss)

但佢都有敗北之處,就係佢無得俾個客人自己揀食咩麵質同油度。如果有得揀會更好。(waiting)

豚骨蒜頭拉麵 ($85)