Ringer Hut 稜閣屋 (長崎素麵但唔啱香港人)

人均消費：HKD$47

呢期睇報紙雜誌，Ringer Hut 呢個名出現超過數十次，我又成日周圍搵野食，又點會唔試下新野，未去之前我都做左少少Research，呢間Ringer Hut 係日本有成500間分店，d麵又係日本第一，第三同第十。嘩，好似好堅咁啦，佢今個月12日開張，咁我專登搵晚閒日去食。

食完即時覺得只有Keep Fit 中人先會Like，事關佢係成碗菜加麵。肉都只有細蝦3隻。佢收緊我成$59一碗。食菜，我自己整都得啦。我個人意見，如果你唔係素食主義者，真係可以慳番幾十蚊。食其他拉麵好過。香港人好多都係無食不歡，呢間日本拉麵咁多菜，我唔知佢可以生存幾耐。

Champon ($59)

先講下佢碗Champon，講名氣，佢原來係日本朝日電視台既日本第一。係咪好吸引呢？全日本第一wor，點都會唔錯。

按下一頁既實物圖。

圖片僅供參考，同個Menu 差好遠，賣相都唔係好得。佢既麵身係粗麵身，唔係好多間既粗麵身係整得好食，因為個軟硬度都唔易掌握到。呢間野既粗麵身當然係差啦，超硬。咁太硬諗住等多半分鐘先食，點知出鹼水。一碗拉麵，洗唔洗咁快就出鹼水味。想搵塊肉出黎吊下味啦，都無。只有細蝦3隻，仲要唔爽口。講到咁，我都唔係好明點解佢係日本第一。成碗野都係雜菜拉麵。所以奉勸大家諗清楚先好去。

呢個Set 佢Offer 兩款獨特風味醬生薑味 或 柚子味，我個人就唔係好Like 喇，↓圖有佢既風味醬，你睇下，佢d油既比例多到呢，我都唔係咁想落d麵度。同埋d柚子唔係好清。Dislike。

長崎香脆麵 ($35)

長崎香脆麵，講名氣，佢原來係日本朝日電視台既日本第十，其實係日本版肉絲炒麵，不過佢就係用幼麵。叫做有少少Surprise，話晒都叫脆麵。食過港版肉絲炒麵都知個麵一上檯就要即食，如果唔即食，個麵身就好快淋晒。呢個日本第十既香脆幼麵，因為佢用幼麵，所以仲快淋晒。敗北again。加上佢既菜同Champon既菜係一樣，欠缺特式。

圖片又係僅供參考，麵身少少，菜就多多。如果你係食開齋既人，呢知個香脆麵都係一個幾好既麵。但我個人就Like 食港版肉絲炒麵。仲脆仲好食。大大碟。

坐位就靚

好：素食主義者好Buy
壞：食完唔飽

光顧日期：16 October, 2013

地址 : 牛頭角淘大商場第二期地下G234-G237舖
Openrice : http://www.openrice.com/restaurant/sr2.htm?shopid=151617